महाराष्ट्र संवाद न्यूज
अनंत पांगारकर @ ७५८८६००९५०
संगमनेर : दूधगंगा नागरी सहकारी पतसंस्थेच्या ८१ कोटी रुपयांच्या अपहार प्रकरणातील मुख्य मास्टर माईंड आरोपी राजकीय प्रतिष्ठित नेता भाऊसाहेब कुटे याच्यापर्यंत अद्याप आर्थिक गुन्हे शाखेला पोहोचण्यात अपयश आले असतानाच आता संगमनेरच्या जिल्हा व अतिरिक्त सत्र न्यायालयाने या प्रकरणातील आणखी एक प्रमुख आरोपी छत्रपती संभाजी नगर येथील चेतन नागराज बाबा कपाटे उर्फ सुदर्शन महाराज यांचा अटकपूर्व जामीन अर्ज फेटाळून लावला आहे.
आतापर्यंत अपवाद वगळता न्यायालयाने या प्रकरणातील बहुतांशी आरोपीचे अटकपूर्व जामीन अर्ज फेटाळलेले आहेत. मात्र आरोपींचा गुन्ह्यातील सहभाग लक्षात घेता आरोपींची पोलीस चौकशी होणे आवश्यक असल्याने न्यायालयाने आरोपींचे जामीन अर्ज फेटाळून देखील एकाही आरोपीला पकडण्यात आर्थिक गुन्हे शाखेला यश मिळालेले नाही. राजकीय प्रतिष्ठित आरोपी असल्याने आर्थिक गुन्हे शाखेवर मोठ्या प्रमाणात राजकीय दबाव असल्याचे देखील बोलले जात आहे.
या आर्थिक गुन्ह्यामध्ये मुख्य आरोपींत पतसंस्थेचा चेअरमन भाऊसाहेब दामोदर कुटे याच्यासह व्यवस्थापक भाऊसाहेब विठ्ठल गुंजाळ, चीफ अकाउंटंट भाऊसाहेब संतू गायकवाड, चेतन नागराज बाबा कपाटे उर्फ सुदर्शन महाराज (छत्रपती संभाजीनगर) यांच्यासह दादासाहेब भाऊसाहेब कुटे, संदीप भाऊसाहेब कुटे, अमोल भाऊसाहेब कुटे, विमल भाऊसाहेब कुटे, शकुंतला भाऊसाहेब कुटे, अमोल कृषी सेवा केंद्र प्रोप्रायटर सोनाली दादासाहेब कुटे, अमोल ट्रेडिंग कंपनी प्रोप्रायटर दादासाहेब भाऊसाहेब कुटे, श्री डेव्हलपर्स संदीप भाऊसाहेब कुटे (सर्व संगमनेर), यांच्यासह कृष्णराव श्रीपतराव कदम, श्रीमती प्रमिला कृष्णराव कदम, अजित कृष्णराव कदम, सुजित कृष्णराव कदम (सर्व रा. देवळाली प्रवरा, ता. राहुरी) व संदीप दगडू जरे (रा. अहमदनगर) यांचा समावेश आहे.
मुख्य आरोपी भाऊसाहेब कुटे आणि त्याच्या घरातील सदस्यांसह कृष्णराव श्रीपतराव कदम, श्रीमती प्रमिला कृष्णराव कदम यांचा अटकपूर्व जामीन अर्ज संगमनेर न्यायालयाने फेटाळलेला आहे. भाऊसाहेब कुटे वगळता उर्वरित आरोपींनी छत्रपती संभाजीनगर खंडपीठात धाव घेतली आहे. तर या गुन्ह्यातील आणखी एक आरोपी छत्रपती संभाजीनगर येथील चेतन नागराज बाबा कपाटे उर्फ सुदर्शन महाराज यांचा अटकपूर्व जामीन अर्जही जिल्हा न्यायालयाने फेटाळून लावला आहे. त्यामुळे महाराजांच्या अडचणीतही आता वाढ झाली आहे.
राजकीय दृष्ट्या प्रतिष्ठित आरोपींमुळे आर्थिक गुन्हे शाखेची आरोपींवर कृपादृष्टी…
संगमनेर मधील अर्थकारणात अग्रेसर असलेल्या दूधगंगा नागरी सहकारी पतसंस्थेमधील तब्बल 81 कोटी रुपयांच्या आर्थिक घोटाळ्याच्या प्रकरण समोर आल्यानंतर ऑगस्टमध्ये या संदर्भात संगमनेर शहर पोलीस ठाण्यात गुन्हा दाखल झाला. गुन्हा दाखल होताच तत्कालीन तपास अधिकारी पोलीस निरीक्षक भगवान मथुरे यांनी पाच आरोपींना लगेचच अटक केली होती. तर गुन्हा दाखल होत असल्याची माहिती मिळाल्याने मुख्य आरोपी भाऊसाहेब कुटे आपल्या कुटुंबीयातील आरोपीस समवेत फरार होण्यात यशस्वी झाला. त्याचबरोबर देवळाली प्रवरा येथील कदम कुटुंबीयांनाही राजकीय पार्श्वभूमी असल्याचे बोलले जाते. गुन्हा दाखल होऊन पाच महिन्यांचा कालावधी उलटून देखील अहमदनगरच्या आर्थिक गुन्हे शाखेचे अधिकारी आरोपींपर्यंत पोहोचू शकले नाही. या गुन्ह्यातील आरोपी निष्पन्न झालेले असताना देखील त्यांना पकडण्यासाठी तपास अधिकाऱ्यांकडून होणारी टाळाटाळ लक्षात घेता त्यांची आरोपींवर कृपादृष्टी तर नाही ना असा प्रश्न उपस्थित झाला आहे.
