महाराष्ट्र संवाद न्यूज
संगमनेर तालुक्यातील पठार भागातील साकूर जवळील चिंचेवाडी येथे गुरुवारी आढळून आलेल्या वृद्धाच्या खून प्रकरणी पोलिसांनी चौघा संशयितांना ताब्यात घेतले आहे. त्यामुळे या खून प्रकरणाचा उलगडा होण्याची चिन्हे निर्माण झाली आहेत.
साकुर जवळील चिंचेवाडी येथील मलीबाबा मंदिरासमोर असलेल्या पत्र्याच्या शेडमध्ये गुरुवारी सकाळी देवराम मुक्ता खेमनर (वय ६५) या वृद्धाचा दगडाने ठेचून निर्घृण खून केल्याची घटना समोर आली होती. मृतदेहाजवळ दगड, चप्पल, आधारकार्ड आढळून आले. यावेळी दगड पुर्णपणे रक्ताने माखलेले होते. बुधवारी मध्यरात्री घडलेल्या या घटनेमुळे पठार भागात खळबळ उडाली होती. या खून प्रकरणाचा छडा लावण्याचे आव्हान पोलिसांसमोर निर्माण झाले आहे.
घटनेची माहिती मिळताच घारगाव पोलीस ठाण्याचे पोलिस निरीक्षक संतोष खेडकर, पोलिस उपनिरीक्षक उमेश पतंगे, पोलिस हेड कॉन्स्टेबल गणेश लोंढे, सुभाष बोडखे, प्रमोद गाडेकर यांच्यासह पोलिस कर्मचाऱ्यांनी घटनास्थळी धाव घेतली होती. याशिवाय श्रीरामपूरच्या अतिरिक्त पोलीस अधीक्षक स्वाती भोर, संगमनेरचे पोलीस उपाधीक्षक सोमनाथ वाघचौरे यांनी देखील घटनास्थळी भेट देत तपासा संदर्भात निर्देश दिले होते. घटनास्थळी श्वानपथक व ठसे तज्ञांनाही पाचारण करण्यात आले होते.
दरम्यान पोलीस तपास सुरू असताना या प्रकरणी चार संशयितांना पोलिसांनी ताब्यात घेतले असून त्यांची चौकशी सुरू असल्याची माहिती पोलीस उपाधीक्षक वाघचौरे यांनी दिली आहे. चौकशीअंती या खून प्रकरणाचा उलगडा होण्याची शक्यता व्यक्त होत आहे.
