महाराष्ट्र संवाद न्यूज
संगमनेर – संगमनेर तालुक्यातील पठार भागातील साकूर जवळील चिंचेवाडी येथे गुरुवारी आढळून आलेल्या वृद्धाच्या खुनाची उकल करण्यात नगर एलसीबीच्या पथकाला यश आले आहे. चोवीस तासाच्या आत पथकाने दोघा सराईत आरोपींना पकडले असून दारूसाठी त्यांनी वृद्धाच्या खिशातील पैसे काढून खून केल्याची माहिती समोर आली आहे.
नामदेव रंगनाथ सोन्नर (वय २५, रा. चिंचेवाडी, साकुर, ता. संगमनेर) व सुरेश बाबुराव कोकरे (वय २५, रा. कोकरेवस्ती, चिंचेवाडी, साकुर, ता. संगमनेर) अशी या दोघा आरोपींची नावे आहेत. संगमनेर तालुक्यातील साकुर जवळील चिंचेवाडी येथील मलीबाबा मंदिरासमोर असलेल्या पत्र्याच्या शेडमध्ये गुरुवारी सकाळी देवराम मुक्ता खेमनर (वय ६५) या वृद्धाचा डोक्यात दगड घालून निर्घृण खून केल्याची घटना समोर आली होती.
यासंदर्भात अज्ञात व्यक्ती विरोधात घारगाव पोलीस ठाण्यात खुनाचा गुन्हा दाखल करण्यात आला होता. घारगाव पोलिसांसह अहमदनगर एलसीबीचे पोलीस पथक या गुन्ह्याचा समांतर तपास करत होते. पोलीस अधीक्षक राकेश ओला, श्रीरामपूरच्या अतिरिक्त पोलीस अधीक्षक स्वाती भोर, संगमनेरचे पोलीस उपाधीक्षक सोमनाथ वाघचौरे यांनी देखील तपासा संदर्भात स्थानिक पोलिसांना निर्देश दिले होते.
तसेच ओला यांच्या आदेशावरून एलसीबीचे पोलीस निरीक्षक दिनेश आहेर यांच्या नेतृत्वाखाली पोलीस उपनिरीक्षक तुषार धाकराव, पोलीस हेडकॉन्स्टेबल अतुल लोटके, दत्तात्रय गव्हाणे, सचिन अडबल, देवेंद्र शेलार, पोलीस नाईक रवींद्र कर्डिले, संतोष खैरे, विजय ठोंबरे, फुरखान शेख, पोलीस कॉन्स्टेबल रणजीत जाधव, आकाश काळे, बाळासाहेब गुंजाळ, प्रमोद जाधव, अमृत आढाव, किशोर शिरसाठ, प्रशांत राठोड, चंद्रकांत कुसळकर यांचे पथक या गुन्ह्याचा समांतर तपास करत होते.
तपासा दरम्यान चिंचेवाडी परिसरातील डोंगरावर लपून बसलेल्या संशयितांना ताब्यात घेत त्यांच्याकडे चौकशी केली असता नामदेव सोन्नर व सुरेश कोकरे या दोघा आरोपींनी गुन्ह्याची कबुली दिली. पोलिसांनी पकडलेल्या आरोपी पैकी नामदेव सोन्नर सराईत गुन्हेगार असून त्याच्या नावावर पोलिस ठाण्यात चोरी, जबरी चोरीचे वेगवेगळे गुन्हे दाखल असून घारगाव पोलीस ठाण्यात दाखल असलेल्या एका गुन्ह्यात तो फरार होता.
बुधवारी देवराम खेमनर हे मलीबाबा मंदिराच्या पत्र्याच्या शेडमध्ये झोपलेले असताना या दोघा सराईत आरोपींनी दारू पिण्यासाठी त्यांच्या खिशातील पैसे काढून घेत त्यांच्या डोक्यात दगड टाकून त्यांचा खून केला असल्याचे तपासात समोर आले आहे.
