महाराष्ट्र संवाद न्यूज
अहमदनगर -कोयत्याच्या धाकावर दहशत निर्माण करून पुण्यात धुमाकूळ घालणाऱ्या टोळीला नगरच्या कोतवाली पोलिसांनी केडगाव परिसरातील एका हॉटेलमधून जेरबंद केले आहे. पोलिसांनी पकडलेल्या आरोपीमध्ये टोळीतील सराईत आरोपींचा समावेश आहे.
नगरच्या केडगाव परिसरात असलेल्या एका हॉटेलमध्ये पुण्यातील आरोपींची टोळी बसलेली असल्याची माहिती खबऱ्यामार्फत कोतवाली पोलीस ठाण्याचे निरीक्षक प्रताप दराडे यांना मिळाली होती. पोलिस निरीक्षक प्रताप दराडे यांच्या मार्गदर्शनाखाली तात्काळ मिळालेल्या माहितीच्या आधारे हेड कॉन्स्टेबल शाहीद शेख, रवींद्र टकले, राहुल शिंदे, योगेश कवाष्टे, सलीम शेख, दीपक रोहकले, तानाजी पवार, सूरज कदम, सत्यजित शिंदे, महेश पवार, शिवाजी मोरे, प्रमोद लहारे आदींच्या पथकाने हॉटेल परिसरात सापळा लावला.
संधी मिळताच पथकाने पुण्यात कोयत्याच्या धाकावर दहशत निर्माण करणाऱ्या वाहनांची तोडफोड करणाऱ्या टोळीतील आरोपींना बेड्या ठोकल्या.
पोलिसांनी पकडलेल्या आरोपींमध्ये गणेश बबन खारे (वय २६, रा. हेळंब, ता. देवणी, जि. लातूर), कैवल्य दिनेश जाधव (वय १९, रा. अंबाजोगाई, जि. बीड), ऋषिकेश हरी आटोळे (वय २०, रा. पडवळनगर, थोरगाव, पुणे), सुमित सिद्राम माने (वय २३, रा. शिवराजनगर, राहटणी, पुणे), प्रीतम सुनील भोसले (वय २१, रा. आदर्शनगर, काळेवाडी, पुणे), विराज विनय शिंदे (वय २०, रा. पर्वती, पुणे), रोहित मोहन खताळ (वय २२, रा. थेरगाव, पुणे) यांचा समावेश आहे.
सुमित माने व रोहित खताळ हे दोघेही पोलिसांच्या रेकॉर्डवरील सराईत गुन्हेगार असून त्यांच्यावर वाकड पोलिस ठाण्यात खुनी हल्ला, मारहाण, आर्म अॅक्ट, दरोडा, चोरी असे गुन्हे दाखल आहेत.
