महाराष्ट्र संवाद न्यूज
पुणे: राधाकृष्ण विखे पाटील सहकारी ट्रक वाहतूक संस्थेच्या पेट्रोल पंपावर १० हजारांची लाच घेताना पकडलेल्या वजन मापे निरीक्षकाच्या पुण्यातील घरात तब्बल २८ लाख ५० हजार रुपयांची रोकड सापडली आहे.
अशोक श्रीपती गायकवाड (वय ५२, रा. वैध मापनशास्त्र, श्रीरामपूर) असे या निरीक्षकाचे नाव आहे. गायकवाड याने राज्य मंत्रिमंडळातील वजनदार मंत्री असलेल्या महसूल मंत्री राधाकृष्ण विखे पाटील यांच्या अधिपत्याखाली असलेल्या प्रवरानगर येथील राधाकृष्ण विखे पाटील सहकारी संस्थेच्या पेट्रोल पंपाची वार्षिक तपासणी करुन स्टॅम्पिंग प्रमाणपत्र देण्यासाठी १२ हजार रुपयांची लाच मागितली होती.
त्यानंतर लाच लुचपतच्या नगर विभागाच्या अधिकाऱ्यांनी सापळा रचून १० हजार रुपयांची लाच घेताना गायकवाड याला पकडले होते. त्यानंतर नगरच्या लाच लुचपत प्रतिबंधक विभागाने ही माहिती पुण्यातील लाच लुचपत प्रतिबंधक विभागाला कळविली.
माहिती मिळाल्यानंतर पुणे विभागाचे पोलिस अधीक्षक अमोल तांबे, अपर पोलिस अधीक्षक डॉ. शीतल जानवे यांच्या मार्गदर्शनाखाली पोलिस निरीक्षक विद्युलता चव्हाण, सहायक फौजदार मुकुंद आयचित, हवालदार नवनाथ वाळके, चालक दामोदर जाधव यांनी गायकवाड याच्या सिंहगड रोडवर येथील निवासस्थानी सोमवारी रात्री तातडीने छापा टाकत घरझडती घेतली.
या छाप्यात लाच लुचपतच्या अधिकाऱ्यांना कपाटामध्ये नोटांचे बंडलच्या बंडल आढळून आले. छाप्यात आढळून आलेल्या रकमेची मोजदाद केले असता ती तब्बल २८ लाख ५० हजार रुपये होती. याशिवाय गायकवाडच्या घरात मालमत्तेसंदर्भात अनेक कागदपत्रे आढळून आली आहेत.
