संगमनेर – काँग्रेस विधिमंडळ पक्षाचे नेते आमदार बाळासाहेब थोरात यांच्या वाढदिवसानिमित्त आनंद सोहळ्यात होत असलेल्या ‘शिवपुत्र संभाजी’ या महानाट्यात शंभुराजे छत्रपती संभाजी महाराजांच्या बुद्धीचातुर्य, पराक्रम आणि तेजापुढे कावेबाज अनाजीपंत निष्प्रभ ठरले. तर महाराष्ट्र धर्म वाचवण्यासाठी प्राण्यांची आहुती देणाऱ्या छत्रपती शंभूराजाचा स्फूर्तीदायी इतिहास जिवंत झाला.
जाणता राजा मैदानावर खासदार डॉ. अमोल कोल्हे यांची प्रमुख भूमिका असलेल्या ‘शिवपुत्र संभाजी’ या महाराष्ट्राला संगमनेर करांचा परिसरातील नागरिकांची दररोज पन्नास हजारावर उपस्थिती लाभत असल्याने जाणता राजा मैदान या महानाट्यामुळे प्रथमत:च हाउसफुल्ल बघायला मिळत आहे.
महानाट्याच्या दुसऱ्या दिवशी काँग्रेस विधिमंडळ पक्षाचे नेते आमदार बाळासाहेब थोरात, माजी आमदार डॉ. सुधीर तांबे, कॅन्सरतज्ञ डॉ. जयश्रीताई थोरात यांच्यासह संगमनेर तालुक्यातील विविध संस्थांचे पदाधिकारी व मान्यवर मोठ्या संख्येने उपस्थित होते.
बाल शंभूराजांची आग्र्यावरून सुटका, शंभूराजांचे रायगडावर झालेले आगमन, यानंतर शंभूराजांचा शाही विवाह, शिवाजी महाराज आजारी असताना कारभाऱ्यांनी केलेला कावा हे पाहताना अंगावर रोमांच उभे राहत होते.
अत्यंत जोशपूर्ण आवेशात डॉ. अमोल कोल्हे यांनी सादर केलेली संभाजी महाराजांच्या भूमिका आणि प्रत्येक संवाद हा उपस्थितांच्या अंगावर शहारे आणत होता. तर कावेबाज अनाजी पंतांनी आखलेली खेळी, त्यात अडकलेल्या महाराणी सोयराबाई आणि संभाजी महाराजांना बदनाम करण्याचा कट, यामुळे उपस्थितांमध्ये अनाजी पंतांची भूमिका करणारे महेश कोकाटे यांच्याबद्दल प्रेक्षकांमध्ये प्रचंड राग निर्माण होताना दिसत होता.
तर महाराणी येसूबाईची भूमिका साकारत असलेल्या अभिनेत्री स्नेहलता वसईकरणे सर्वांची मने जिंकली. जंजिरा मोहीम, मोगली फौजांचे महाराष्ट्रावर आक्रमण, सुमारे तीनशे कलाकारांच्या उपस्थितीत भव्य दिव्य झालेले हे महानाट्य आणि संभाजी राजेंना फितूरीने झालेली अटक, त्यांचे झालेले हाल यामुळे प्रत्येकाच्या डोळ्यात पाणी आले.
महानाट्याला होणारी गर्दी लक्षात घेत आयोजकांच्या वतीने रस्त्यावर एलडी स्क्रीनही लावण्यात आल्या होत्या. या महानाट्याचा सोहळा संगमनेरकरांसाठी एक संस्मरणीय अनुभव ठरला आहे.
