अहमदनगर – नेवासा येथील संशयित आपल्या साथीदारांसह नगरमध्ये गावठी कट्टा विक्री करण्याच्या उद्देशाने येणार असल्याची माहिती मिळाल्यानंतर दबा धरून बसलेल्या नगर एलसीबीच्या पथकाने तिघा जणांना गावठी कट्यासह पकडले असून त्यांच्याकडून सुमारे एक लाख रुपये किमतीचा मुद्देमाल हस्तगत केला आहे.
लखन भाऊसाहेब आल्हाट, लखन उर्फ लक्ष्मण सुधाकर सरोदे व अविनाश उर्फ देविदास उर्फ आबा विक्रम उर्फ विक्रांत आल्हाट (तिघे रा. मोरया चिंचोरे, ता. नेवासा, जि. अहमदनगर) अशी पोलिसांनी पकडलेल्या आरोपींची नावे आहेत.
नगरचे पोलीस अधीक्षक राकेश ओला यांनी आगामी होऊ घातलेल्या लोकसभा निवडणुकीच्या पार्श्वभूमीवर स्थानिक गुन्हे शाखेचे पोलीस निरीक्षक दिनेश आहेर यांना हवाई दरीत्या शास्त्रीय बाळगणाऱ्यांवर कारवाई करण्याचे आदेश दिले होते. त्यानंतर आहेर यांनी स्थानिक गुन्हे शाखेचे सहाय्यक पोलीस निरीक्षक हेमंत थोरात, सहाय्यक फौजदार भाऊसाहेब काळे, पोलीस नाईक रविंद्र कर्डीले, भिमराज खर्से, संदीप दरंदले, गणेश भिंगारदे, संतोष खैरे, पोलीस कॉन्स्टेबल बाळासाहेब गुंजाळ, प्रशांत राठोड, उमांकात गावडे यांचे पथक नेमत या पथकाला कारवाईचे आदेश दिले होते.
नेवासा येथील संशयित आरोपी लखन आल्हाट हा आपल्या साथीदारांसह गावठी कट्टा विक्री करण्याच्या उद्देशाने नगरच्या सावेडी परिसरातील भिस्तबाग महालासमोर येणार असल्याची माहिती पोलिसांना मिळाली होती. त्यानंतर पोलिसांनी सोमवारी सकाळी साडेअकरा वाजण्याच्या सुमारास संशयित आरोपींना पकडण्यासाठी तेथे सापळा लावला. मात्र तेथे आलेल्या आरोपींना पोलिसांचा संशय आल्याने त्यांनी त्यांच्याकडील मोटार सायकलवरून पळून जाण्याचा प्रयत्न केला असता, पथकाने दोघांना जागेवर पकडले तर तिसऱ्या आरोपीला पाठलाग करत पकडले.
पोलीस पथकाने पकडलेल्या आरोपींची अंगझडती घेतली असता त्यांना तीस हजार रुपये किमतीचा गावठी कट्टा, एक हजार रुपये किमतीचे दोन जिवंत काडतुसे आणि सत्तर हजार रुपये किमतीची विना क्रमांकाची होंडा कंपनीचे मोटार सायकल असा सुमारे एक लाख रुपये किमतीचा मुद्देमाल आढळून आला.
