संगमनेर – राज्याचे माजी मंत्री, आमदार बाळासाहेब थोरात यांच्या मार्गदर्शनाखाली तालुक्यातील महिला-युवतींचे सबलीकरण आणि आरोग्याच्या प्रश्नासाठी काम करणाऱ्या एकविरा फाउंडेशनच्या माध्यमातून ८ ते १० मार्च दरम्यान युवती व महिलांसाठी टेनिस बॉल क्रिकेट, कुस्ती, बॅडमिंटन व रस्सीखेच स्पर्धेचे आयोजन केल्याची माहिती एकविराच्या अध्यक्ष कॅन्सर तज्ञ डॉ. जयश्री थोरात यांनी दिली.
थोरात म्हणाल्या, ८ मार्च हा दिवस सर्वत्र जागतिक महिला दिन म्हणून साजरा होतो. यानिमित्त संगमनेर तालुक्यात महिलांसाठी विविध उपक्रमांचे आयोजन केले जात असते. सर्व क्षेत्रात आज महिला पुरुषांच्या बरोबरीने काम करत आहे ही सर्वांसाठी अभिमानास्पद बाब आहे. गतवर्षी महिला क्रिकेटमध्ये आयपीएल सुरू झाला. त्याला जगभरातून मोठा प्रतिसाद मिळाला आहे.
महिला दिनाच्या पार्श्वभूमीवर ८ मार्च ते १० मार्च या कालावधीत सहकार महर्षी भाऊसाहेब थोरात क्रीडा संकुलामध्ये चालणाऱ्या टेनिस बॉल क्रिकेट स्पर्धेचा शुभारंभ सकाळी १० वाजता आमदार बाळासाहेब थोरात, माजी आमदार डॉ. सुधीर तांबे, नगराध्यक्ष दुर्गाताई तांबे, कॅन्सर तज्ञ डॉ. जयश्री थोरात यांच्या उपस्थितीत होत आहे.
तालुक्यासह राज्यभरातून महिलांचे क्रिकेट संघ यात सहभागी होणार आहे. स्पर्धक संघांना ड्रेस कोड देण्यात आले असून स्पर्धेसाठी मैदान, एलईडी व्यवस्था, कॉमेंट्री व्यवस्था, बैठक व्यवस्था, खेळाडूंसाठी स्वतंत्र व्यवस्थेसह स्पर्धेची अद्यावत तयारी झाली आहे.
क्रिकेट स्पर्धेशिवाय शालेय व महाविद्यालयीन विद्यार्थिनी, युवती व महिलांसाठी बॅडमिंटन, कुस्ती व रस्सीखेच स्पर्धाही याच क्रीडा संकुलात आयोजित करण्यात आल्या असून त्यासाठी देखील सर्व अत्याधुनिक सुविधा पुरविल्या जाणार आहेत. स्पर्धेत जास्तीत जास्त स्पर्धकांनी सहभाग घ्यावा, असे आवाहन एकविरा फाउंडेशनच्यावतीने करण्यात आले.
