कॅफे चालकाकडून दरमहा हप्ता घेणारा सहाय्यक पोलीस उपनिरीक्षक अडीच हजार घेताना एसीबीच्या ट्रॅपमध्ये

नाशिक, दि. ८ मार्च
कॉलेज परिसरात कॅफे चालवून विद्यार्थ्यांना चुकीच्या कृत्यासाठी आडोसा करून देतो, थांब तुझ्यावर कारवाई करतो असे धमकावत कॅफे चालकाकडून दरमहा २००० ते ३००० रुपये हप्त्याच्या रूपात उकळणारा सहाय्यक पोलीस उपनिरीक्षक गुरुवारी अडीच हजार रुपये घेताना एसीबीच्या जाळ्यात अडकला.
शंकर जनार्दन गोसावी (रा. टाकळी रोड, नाशिक) असे लाचखोर सहाय्यक पोलीस उपनिरीक्षकाचे नाव आहे. लाचखोर गोसावी हा पोलीस आयुक्तालयातील विशेष शाखेत कार्यरत आहे.शहरातील एका कॉलेजच्या परिसरात तक्रारदाराचे कॅफे आहे. या कॅफेमध्ये येणाऱ्या जोडप्यांना प्रायव्हसी मिळावी यासाठी तेथे व्यवस्था (आडोसा) करण्यात आली होती. हा प्रकार लक्षात आल्यानंतर सहा महिन्यांपूर्वी सहाय्यक पोलीस उपनिरीक्षक गोसावी याने कॅफे चालकाची भेट घेत त्याच्यावर कारवाईचा दम देत त्याच्याकडून दरमहा दोन ते तीन हजार रुपये लाचेच्या रूपात हप्ता घेण्यास सुरुवात केली होती.
त्यामुळे वैतागलेल्या कॅफे चालकाने या संदर्भात नाशिकच्या लाच लुचपत विभागाकडे तक्रार केली होती. लाच लुचपत विभागाच्या अधिकाऱ्यांनी तक्रारीची शहानिशा केली. संशयित आरोपी गोसावी हा विशेष शाखेत कार्यरत असताना आणि त्याचा कोणताही संबंध नसताना कॅफे चालकाकडून लाच घेत असल्याचे स्पष्ट झाल्याने लाच लुचपत विभागाने त्याला पकडण्यासाठी सापळा रचला होता.
बुधवारी (६ मार्च) तक्रारदाराकडून अडीच हजार रुपये लाच स्वीकारताना लाच लुचपत प्रतिबंधक विभागाच्या अधिकाऱ्यांनी त्याला रंगेहाथ पकडले. पोलीस निरीक्षक संदीप घुगे, पोलीस नाईक गणेश निंबाळकर व शिपाई नितीन नेटारे यांच्या पथकाने ही कारवाई केली. लाचखोर गोसावी याला अटक करण्यात आली आहे.