दि. १४ मार्च, संगमनेर
सहकाराच्या माध्यमातून तालुक्यातील गोरगरीब माणसांच्या जीवनात आनंद निर्माण करण्यासाठी सहकार महर्षी भाऊसाहेब थोरात यांनी आदर्श तत्व आणि विचार घेऊन सहकार चळवळीत मोठे योगदान दिले. तालुक्याच्या विकासाची रचनात्मक पायाभरणी करताना त्यांनी समाज विकासासाठी आपले संपूर्ण आयुष्य समर्पित केले असून त्यांचे जीवन कार्य पुढील पिढ्यांसाठी सदैव प्रेरणादायी असल्याचे प्रतिपादन युवक काँग्रेसच्या अध्यक्ष कॅन्सर तज्ञ डॉ. जयश्रीताई थोरात यांनी केले.
सहकारमहर्षी भाऊसाहेब थोरात सहकारी साखर कारखान्याच्या कार्यस्थळावरील प्रेरणास्थळ येथे अमृत उद्योग समूहाच्यावतीने आयोजित १४ व्या स्मृतिदिनानिमित्त अभिवादन कार्यक्रमात त्या बोलत होत्या.
जिल्हा बँकेचे उपाध्यक्ष माधवराव कानवडे, कारखान्याचे चेअरमन बाबा ओहोळ, दूध संघाचे चेअरमन रणजितसिंह देशमुख, लक्ष्मणराव कुटे, सुधाकर जोशी, संपतराव डोंगरे, गणपतराव सांगळे, संतोष हासे, रामदास वाघ, आर. बी. राहणे, रोहिदास पवार, प्रा. बाबा खरात, दत्तू थोरात, कार्यकारी संचालक जगन्नाथ घुगरकर, केशवराव जाधव, मुख्य कार्यकारी अधिकारी अनिल शिंदे आदींसह विविध पदाधिकारी उपस्थित होते. यावेळी संदिपानी गुरुकुल घुलेवाडी येथील वारकरी विद्यार्थ्यांनी गायलेल्या सुमधुर भक्ती गीत आणि भावगीतांनी आदरांजली अर्पण करण्यात आली.
थोरात म्हणाल्या, भाऊसाहेब थोरात यांनी स्वातंत्र्य चळवळीत योगदान देत स्वातंत्र्य प्राप्तीनंतर सहकारात मोठे काम केले. पाण्यासाठी मोठा संघर्ष केला. मीटर हटावची चळवळ राज्यभर राबवली. सहकाराबरोबर शिक्षण आणि दुग्ध व्यवसायामधून ग्रामीण भागात आर्थिक समृद्धी निर्माण केली. शिस्त, पारदर्शकता, काटकसर ही तत्व त्यांनी सहकारात रुजवली. आज ही तत्त्व देशाला दिशादर्शक ठरत आहेत. जीवनाच्या उत्तरार्धात त्यांनी दंडकारण्य अभियान राबवले. वाचनाची आवड असलेल्या दादांनी साहित्य क्षेत्रातही योगदान दिले. विविध क्षेत्रांचा मोठा अभ्यास असलेल्या सहकारमहर्षी भाऊसाहेब थोरात यांचे संपूर्ण जीवन कार्य हे पुढील पिढ्यांसाठी सदैव मार्गदर्शक ठरेल.
यावेळी भाऊसाहेब शिंदे, विनोद हासे, विलास कवडे, रमेश गुंजाळ, ॲड. अशोक हजारे, डॉ. सुजित खिलारी, हौशीराम सोनवणे, तुषार दिघे, शांताराम कढणे, विजय राहणे, चंद्रकांत कडलग, रोहिदास सानप आदी उपस्थित होते. प्रास्ताविक बाबा ओहोळ यांनी केले. जगन्नाथ घुगरकर यांनी आभार मानले.
