दिनांक १७ मार्च, अहमदनगर
नगर अर्बन बँक आर्थिक गैरव्यवहार प्रकरणी अटक करण्यात आलेल्या संगमनेरमधील अमृतवाहिनी बँकेचा माजी अध्यक्ष आणि उद्योजक असलेल्या अमित पंडित याला न्यायालयाने २४ मार्चपर्यंत पोलीस कोठडीत ठेवण्याचे आदेश दिले आहे. त्यामुळे सात दिवसांच्या पोलीस कोठडीत पंडित यांच्याकडून नेमकी काय माहिती समोर येते, हे लवकरच स्पष्ट होणार आहे.
नगर अर्बन बँकेतील २९१ कोटी रुपयांच्या महा घोटाळा प्रकरणात बँक बुडविण्यास कारणीभूत ठरलेल्या १०५ आरोपींपैकी एक असलेल्या संगमनेर मधील उद्योजक अमित पंडित याने घेतलेल्या कर्जाची रक्कम पंचवीस कोटीच्या घरात असल्याचे बोलले जाते. त्यामुळे नगरच्या आर्थिक गुन्हे शाखेने अशा बड्या कर्जदारांविरुद्ध आपला फास आवळण्यास सुरुवात केली असल्याचे दिसते. शनिवारी दुपारी बँकेला फसविणाऱ्या या बड्या कर्जदाराला संगमनेर शहर पोलीस ठाण्याचे पोलीस निरीक्षक भगवान मथुरे आणि त्यांच्या पथकाने ताब्यात घेतले होते.
आर्थिक गुन्हे शाखेने नगर अर्बन बँक महाघोटाळा प्रकरणी अटक केलेल्या अमित वल्लभराय पंडित याला रविवारी अहमदनगर मधील न्यायालयासमोर उभे केले असता न्यायालयाने पंडित याची रवानगी २४ मार्चपर्यंत पोलीस कोठडीत केली आहे. आर्थिक गुन्हे शाखेच्या तपासात आणखी कोणती धक्कादायक माहिती समोर येते याकडे लक्ष लागले आहे.
