दि. २० मार्च, अहमदनगर
१३ मे रोजी अहमदनगर व शिर्डी या दोन्ही मतदारसंघात लोकसभेसाठी मतदान होत आहे. या पार्श्वभूमीवर जिल्हा पोलीस दलाने कायदा व सुव्यवस्था अबाधित ठेवण्यासाठी दोन्ही मतदारसंघातील १७,८९९ गुन्हेगारांवर जिल्हा पोलीस अधीक्षक राकेश ओला यांच्या नेतृत्वाखाली प्रतिबंधात्मक कारवाईचा स्वतंत्र आराखडा तयार केला आहे.
निवडणूक व मतदान प्रक्रिया शांततेत पार पाडण्यासाठी या आराखड्यानुसार शिर्डी व अहमदनगर लोकसभा मतदारसंघात कारवाईस सुरुवात करण्यात आली आहे. जिल्ह्यात ७ हजारावर पोलीस व ४ हजारावर गृहरक्षक दलाचे जवान तैनात केले जाणार आहे.
दोन्ही मतदारसंघात संभाव्य उमेदवारांनी, राजकीय पक्षांनी प्रचाराला सुरुवात केली आहे. तर दुसरीकडे पोलीस यंत्रणेने देखील कायदा सुव्यवस्था बिघडवू शकणाऱ्या गुन्हेगारांवर प्रतिबंधात्मक कारवाईला सुरुवात केली आहे. प्रतिबंधात्मक कारवाई करण्यात येणाऱ्या गुन्हेगारांच्या याद्या जिल्ह्यातील सर्व पोलीस ठाण्यांनी तयार केल्या असून दोन किंवा अधिक गुन्हे दाखल असलेल्यांवर मोक्का, हद्दपारी, स्थानबद्धता अशी प्रतिबंधात्मक कारवाई केली जाणार आहे. पोलीस ठाणे नेहा याचा आढावा वरिष्ठ अधिकाऱ्यांकडून दररोज घेतला जात आहे.
याशिवाय प्रत्येक पोलीस ठाण्याच्या हद्दीत ‘रूटमार्च’ घेतला जात असून ठिकठिकाणी नाकाबंदीचे नियोजन करण्यात आले आहे. नाकाबंदी करण्यात आलेल्या ठिकाणी संबंधित विभागातील पोलीस उपाधीक्षक भेटी देऊन पाहणी करत आहेत. आचारसंहिता उल्लंघन रोखण्यासाठी विविध पथकांची नियुक्ती करण्यात आली असून अंमली पदार्थ, मोठी रोकड, अवैध मद्य उत्पादन आणि वाहतूक, अग्निशस्त्रे यावर विशेष लक्ष केंद्रित करण्यात आले आहे. याशिवाय संवेदनशील मतदान केंद्रांची यादी करण्यात आली असून तेथे देखील लक्ष ठेवले जाणार आहेत.
जिल्ह्यात तीन हजारावर लोकांकडे स्वसंरक्षणासाठी शस्त्र परवाना असून त्यांच्याकडे शस्त्रे जमा करून घेण्यासाठी नियमावली तयार करण्यात आली आहे. विविध गुन्हे दाखल असलेल्या गुन्हेगारांना प्रतिबंधात्मक नोटीस बजावल्या जाणार असून फौजदारी दंड संहितेनुसार समाजकंटकांवर गाव ते जिल्हा पातळीपर्यंत प्रवेश बंदी करण्याचे आदेश देण्यात आले आहे.
