शुक्रवार दि. २३ मार्च, संगमनेर
शासकीय वसुलीच्या दृष्टीने मार्च महिना महत्त्वाचा समजला जात असल्याने शनिवार, रविवार आणि सोमवारी शासकीय सुट्ट्यांचे दिवस असतानादेखील संगमनेर नगर परिषदेचा वसुली विभाग सुरूच राहणार असल्याची माहिती पालिकेचे मुख्याधिकारी राहुल वाघ यांनी दिली आहे.
२०२३ – २०२४ या आर्थिक वर्षातील मालमत्ता व पाणीपट्टी कराच्या वसुलीसाठी मुख्याधिकारी राहुल वाघ यांच्या मार्गदर्शनाखाली विशेष वसुली पथकाचे नियुक्ती करण्यात आली आहे. शासकीय करांचा भरणा वेळेत व्हावा यासाठी या मोहिमेअंतर्गत २३ ते २५ मार्च दरम्यान शासकीय सुट्ट्या असताना देखील नागरिकांची गैरसोय होऊ नये या हेतूने वसुली विभाग सुरूच ठेवला जाणार आहे.
मुख्याधिकारी राहुल वाघ यांच्या उपस्थितीत उपमुख्याधिकारी संजय पेखळे, कर निर्धारण प्रशासकीय अधिकारी प्रल्हाद देवरे, दत्तू साळवे, साजिद पटेल, राजेश गुंजाळ, शहर अभियंता प्रशांत जुन्नरे, प्रदीप मावलकर यांच्यासह विशेष वसुली मोहीम पथकातील इतर अधिकारी व कर्मचारी यांच्या उपस्थितीत मालमत्ता व पाणीपट्टी कराच्या वसुलीचा तसेच पथकाद्वारे थकबाकीदारांवर केलेल्या कारवाईचा आढावा घेण्यात आला.
यावेळी मालमत्ता व पाणीपट्टी कराची जास्तीत जास्त वसुली करण्यासाठी उपस्थितांना सूचना करण्यात आल्या. तसेच थकबाकीदारांवर करण्यात येणाऱ्या कारवाईचा वेग वाढविण्याबाबतही सांगण्यात आले. नागरिकांनी याची नोंद घेऊन शासकीय सुट्टीच्या दिवशी सुद्धा कर भरण्यासाठी नगरपालिकेत यावे व नगरपरिषदेस सहकार्य करण्याचे आवाहन मुख्याधिकारी राहुल वाघ यांनी केले आहे.
