सोमवार दि. २५ मार्च, संगमनेर
गेल्या काही दिवसात संगमनेरात घडलेल्या दोन समाजातील वादाच्या विविध घटनांमुळे सकल हिंदू समाजाच्यावतीने काढण्यात येणाऱ्या संभाव्य हिंदू जन आक्रोश मोर्चाला स्थगिती देण्यात आल्याची माहिती प्रशासनाच्या वतीने देण्यात आली आहे.
प्रांताधिकारी शैलेश हिंगे, तहसीलदार धीरज मांजरे, पोलीस उपाधीक्षक सोमनाथ वाघचौरे, पोलीस निरीक्षक भगवान मथुरे व नगर परिषदेचे मुख्याधिकारी राहुल वाघ या प्रमुख अधिकाऱ्यांच्या उपस्थितीत पत्रकार परिषदेचे आयोजन करण्यात आले होते.
गेल्या काही दिवसात संगमनेरात घडलेल्या विविध घटनांच्या अनुषंगाने पोलीस प्रशासन सतर्क असून समाजात तेढ निर्माण करणाऱ्यांवर कडक कारवाया केल्या जात आहेत. मोर्चाच्या आयोजकांच्या देखील काही मागण्यांवर गांभीर्याने विचार केला जात त्या दृष्टीने कार्यवाही देखील केली जात आहे. त्यामुळे बुधवारी (२७ मार्च) काढण्यात येणाऱ्या मोर्चाला स्थगिती देण्यात आल्याची माहिती प्रांताधिकारी शैलेश हिंगे, पोलीस उपाधीक्षक सोमनाथ वाघचौरे यांनी दिली.
दरम्यान या जातीय तेढ निर्माण करणाऱ्या घटना नंतर संगमनेरमधील तीन बत्ती चौक, कोल्हेवाडी रोड व जोर्वे नाका या ठिकाणी तातडीने सीसीटीव्ही कार्यान्वित करण्यात आले आहे, असे मुख्याधिकारी राहुल वाघ यांनी सांगितले.
लोकसभा निवडणुकीच्या पार्श्वभूमीवर सामाजिक स्वास्थ बिघडविनाऱ्या गुन्हेगारी पार्श्वभूमी असलेल्या गुन्हेगारांवर विविध प्रकारच्या कारवाया सुरू आहेत. अवैध व्यवसायाच्या संदर्भात पोलीस गांभीर्यपूर्वक लक्ष घालतील अशीदेखील माहिती देण्यात आली.
२८ मार्चला संगमनेरमध्ये निघणाऱ्या पारंपारिक शिवजयंती मिरवणुकीसंदर्भात यापूर्वीचे पोलीस परवानगीचे रेकॉर्ड बघून परवानगी दिली जाईल, असे पोलीस निरीक्षक मथुरे यांनी सांगितले.
(बातमीतील पत्रकार परिषदेचे छायाचित्र : प्रसाद सुतार, प्रेस फोटोग्राफर)
