मंगळवार दि. २६ मार्च
संशयित व्यक्ती स्वतःच्या घरातून गांजाची विक्री करत असल्याची माहिती प्राप्त होताच नगरच्या स्थानिक गुन्हे शाखेच्या पथकाने शेवगाव पोलिसांच्या मदतीने टाकलेल्या छाप्यात विक्रीच्या उद्देशाने कुलरमध्ये एका गोणीत दडवून ठेवलेला ३ किलो ९८० ग्रॅम वजन असलेला सुमारे ३९ हजार रुपये किमतीचा गांजा हस्तगत केला आहे.
लोकसभा निवडणुकीच्या पार्श्वभूमीवर जिल्हा पोलीस अधीक्षक राकेश ओला यांनी कायदा सुव्यवस्था अबाधित राखण्यासाठी पोलिस यंत्रणेला सतर्कतेचे आदेश दिले आहेत. स्थानिक गुन्हे शाखेचे पोलीस निरीक्षक दिनेश आहेर यांच्या नेतृत्वाखाली जिल्ह्यातल्या अवैध यांची माहिती काढून त्यांच्यावर कारवाई सत्र सुरू आहे.
शेवगाव पोलीस स्टेशनच्या हद्दीमध्ये संशयित व्यक्ती सादिक शेख राहणार नवीन बाजारतळ तालुका शेवगाव हा कब्जात गांजा बाळगून स्वतःच्या घरात त्याची विक्री करत असल्याची माहिती मिळाली होती. गुन्हे शाखेच्या पथकाने संशयित व्यक्तीच्या घरी छापा टाकला असता घर जडतीमध्ये घरातल्या कुलरमध्ये पांढऱ्या रंगाच्या गोणीत उग्र वास येत असलेल्या बिया, बोंडे, काड्या, पान याचा संलग्न पाला आढळून आला.
आरोपीकडे या संदर्भात विचारणा केली असता त्याने हा गांजा असल्याची माहिती पोलिसांना दिली. पोलिसांनी सादिक फारुक शेख याच्या कब्जातून ३ किलो ९८० ग्रॅम वजन असलेला सुमारे ३९ हजार रुपये किमतीचा गांजा हस्तगत केला.
शेवगाव पोलीस ठाण्यात स्थानिक गुन्हे शाखेचे पोलीस कॉन्स्टेबल शिवाजी अशोक ढाकणे यांनी दिलेल्या फिर्यादीवरून सादिक शेख याच्या विरोधात गुंगीकारक औषधी द्रव्ये आणि मनोव्यापारावर परिणाम करणारे पदार्थ कायदा सन १९८५ चे कलम ८ (क) सह २० (ब) ii प्रमाणे गुन्हा दाखल करण्यात आला असून सदर गुन्ह्याचा तपास शेवगांव पोलीस स्टेशन करीत आहेत.
