रविवार दि. ३१ मार्च
विद्यार्थ्यांच्या जीवनात परिवर्तनासाठी शिक्षण दिशादर्शक ठरते. त्यामुळे विद्यार्थ्यांना घडविणाऱ्या शाळा भौतिक व शैक्षणिकदृष्ट्या विकसित व्हायला हव्या, त्याकरिता शाळेला गावाचा आधार आणि गावाला शाळेचा अभिमान वाटला पाहिजे. धांदरफळच्या देशमुख मळा शाळेने उपक्रमशील शिक्षकांच्या उपक्रमांमधून आणि लोकसहभागातून केलेली प्रगती ही शिक्षण क्षेत्रात राज्यासाठी दिशादर्शक ठरेल, असे प्रतिपादन संगमनेर डाएटचे अधिव्याख्याता अरुण भांगरे यांनी केले.
“मुख्यमंत्री माझी शाळा सुंदर शाळा” या उपक्रमात द्वितीय क्रमांकाद्वारे दोन लाखाचे बक्षीस पटकावणाऱ्या जिल्हा परिषदेच्या देशमुख मळा येथील शाळेत उपक्रमशील शिक्षिका वृषाली कडलग यांनी स्वखर्चातून विद्यार्थ्यांना ३२ डिजिटल पाट्या वितरित केल्या, त्याप्रसंगी ते प्रमुख अतिथी म्हणून बोलत होते. डिजिटल पाट्या मिळाल्याने विद्यार्थ्यांचे चेहरे हरखून गेले.
अध्यक्षस्थानी शाळा व्यवस्थापन समितीचे अध्यक्ष रमेश देशमुख तर व्यासपीठावर सरपंच उज्वला देशमाने, उपक्रमशील शिक्षिका वृषाली कडलग, अरविंद सगभोर, अशोक देशमुख, मुख्याध्यापक हनुमंत अडांगळे, अर्चना नाईकवाडी, रुपाली नाईकवाडी, तेजस्विनी देशमुख आदी उपस्थित होते.
भांगरे म्हणाले, आपल्याला जीवनामध्ये खऱ्या अर्थाने पुढे जायचे असेल तर शिक्षणाशिवाय पर्याय नाही. देशमुख मळा शाळेने शिक्षण क्षेत्रात जे योगदान दिलेले आहे ते खरोखर राज्याच्या शिक्षण क्षेत्रासाठी दिशादर्शक आहे.
उपक्रमशील शिक्षिका वृषाली कडलग यांनीही आपले मनोगत व्यक्त केले. ग्रामस्थांनी शाळेसाठी दिलेल्या योगदानाचा त्यांनी उल्लेख केला. अक्षय खतोडे, संदीप बाळासराफ,अर्चना नाईकवाडी, तेजस्विनी देशमुख, रूपाली नाईकवाडी, अनिता हिरे, वैशाली देशमुख, सचिन कचेरिया, साधना गाडेकर, मच्छिंद्र लकारे आदी यावेळी उपस्थित होते.
कार्यक्रमाचे सूत्रसंचालन अक्षय खतोडे यांनी तर आभार मुख्याध्यापक हनुमंत अडांगळे यांनी मानले.
