मंगळवार, दि.२२ एप्रिल
गेल्या आठवड्यात अहमदनगर एलसीबीच्या पथकाने संगमनेरात कत्तलखान्यावर टाकलेल्या छाप्यात गोमांसासह सुमारे २१ लाख रुपयांचा मुद्देमाल हस्तगत केला होता. त्या पाठोपाठ सोमवारी रात्री अकरा वाजता संगमनेरच्या पोलीस उपाधीक्षकांच्या पथकाने पुन्हा येथील बेकायदेशीर कत्तलखान्यावर टाकलेल्या छाप्यात पोलिसांनी जिवंत गोवंश जनावरांच्या केलेल्या कत्तलीचे सुमारे पाच लाख रुपये किमतीचे अडीच हजार किलो गोमांस बाजारात विक्रीला जाण्यापूर्वीच पकडले.
पोलिसांनी केलेल्या या कारवाईत सलीम जान मोहम्मद कुरेशी (वय १९ वर्ष, सुभाष नगर, कोपरगाव हल्ली रा. मदिना नगर, संगमनेर) व कैश अशपाक कुरेशी (वय २२ वर्ष, रा. मदिना नगर, संगमनेर) दोघा आरोपींना अटक करण्यात आली असून त्यांना संगमनेरच्या न्यायालयाने चार दिवसांची पोलीस कोठडी दिली. तर कारवाई दरम्यान काशीफ असद कुरेशी (रा. मदिना नगर, संगमनेर) हा पळून गेला असल्याची माहिती संगमनेरचे पोलीस उपाधीक्षक सोमनाथ वाघचौरे यांनी दिली.
यासंदर्भात अधिक माहिती अशी, सोमवारी रात्री अकरा वाजण्याच्या सुमारास शहरातील मदिनानगर भागात गोवंश जनावरांची कत्तल केली जात असल्याची माहिती पोलीस उपाधीक्षक सोमनाथ वाघचौरे यांना माहिती मिळाली होती. पोलीस उपाधीक्षकांच्या आदेशावरून पोलीस कर्मचारी राहुल डोके, राहुल सारबंदे आदींच्या पथकाने घटनास्थळी जात तपासणी केली असता एका पत्र्याच्या शेडच्या आडोशाला तिघेजण गोवंश जनावराची कत्तल करताना आढळून आले. कारवाई दरम्यान दोघे पोलिसांच्या हाती लागले तर एक जण अंधाराचा फायदा घेत पळून जाण्यात यशस्वी झाला.
कारवाई पोलिसांनी सुमारे पाच लाख रुपये किमतीचे अडीच हजार किलो गोमांस आणि कत्तलीसाठी वापरण्यात येणारे कुऱ्हाडी, सूरे जप्त केले आहे. पोलीस कॉन्स्टेबल राहुल सारबंदे यांच्या फिर्यादीवरून संगमनेर शहर पोलीस ठाण्यात तिघा आरोपीविरोधात गुन्हा दाखल करण्यात आला असून पुढील तपास पोलीस करत आहेत.
