सोमवार, दि.२९ एप्रिल
राज्यात दोन टप्प्यातील मतदान प्रक्रिया पार पडल्यानंतर आता पुढच्या टप्प्यातील प्रचाराने वेग घेतला आहे. महायुतीच्या उमेदवारांसाठी पंतप्रधान नरेंद्र मोदी यांनी राज्यात सभांचा धडाका लावला असताना सोमवारची पुण्यातील त्यांची सभा एका सुशिक्षित बेरोजगार तरुणामुळे चर्चेत आली आहे.
पुणे शिरूर बारामती आणि मावळ या चार लोकसभा मतदारसंघातील महायुतीच्या उमेदवारांसाठी पंतप्रधान नरेंद्र मोदी यांच्या महा विजय संकल्प सभेचे पुण्यातील वानवडी येथील रेस कोर्स मैदानावर आज (सोमवारी) संध्याकाळी साडेपाच वाजता आयोजन करण्यात आले आहे.
सभेसाठी जवळपास दोन लाखावर लोकांची उपस्थिती राहील, या दृष्टीने सभेची जय्यत तयारी आठवडाभरापासून सुरू होती. यातच आता एका सुशिक्षित बेरोजगार तरुणाने या परिसरात लावलेले फ्लेक्स चर्चेत आले आहे. हे फ्लेक्स समाज माध्यमावर मोठ्या प्रमाणात व्हायरल झाले आहेत.
काय आहे चर्चेत आलेले फ्लेक्स…
रेस कोर्स मैदानाच्या परिसरात वानवडी भागात राहणाऱ्या आयुष दीपक कांबळे या तरुणाने, एक सुशिक्षित बेरोजगार पुणेकर निर्यात बंदी असो, महागाई असो, बेरोजगार असो, इथल्या प्रत्येक शेतकऱ्याचा, माय माऊलीचा, युवकांचा आक्रोश तुम्हाला तडीपार केल्याशिवाय गप्प राहणार नाही. जाती, धर्म, मंदिर, मशिद यावर बोलण्यापेक्षा विकासावर, बेरोजगारीवर बोला. या आशयाचे मजकूर असलेले फ्लेक्स सभेच्या परीसरात लावले आहेत. हे फ्लेक्स सोशल मीडियावर तुफान व्हायरल झाले आहेत.
