गुरुवार, दि. २ मे
देशी दारू विक्रीचा व्यवसाय सुरळीत चालू ठेवण्यासाठी तसेच बिअर बार परमिट रूमवर कारवाई न करण्याकरिता तक्रारदाराकडून ११ हजाराची लाच घेणारा राज्य उत्पादन शुल्क विभागाच्या भरारी पथकाचा सहाय्यक दुय्यम निरीक्षक लाच लुचपत विभागाने कोपरगावमध्ये पकडला.
खलील खुर्शीद शेख (वय ४० वर्षे, रा. खडकी रोड, चर्चचे समोर, कोपरगाव, ता. कोपरगाव जि. अहमदनगर) असे लाचखोर भरारी पथकाच्या सहाय्यक दुय्यम निरीक्षकाचे नाव आहे. शेख याच्या विरोधात कोपरगाव पोलीस ठाण्यात गुन्हा दाखल करण्यात आला आहे.
नासिक विभागाच्या पोलीस अधीक्षक शर्मिष्ठा घारगे-वालावलकर यांच्या मार्गदर्शनाखाली नाशिकच्या पथकाच्या पोलीस निरीक्षक गायत्री जाधव यांच्या नेतृत्वाखाली गुरुवारी कोपरगावमध्ये ही कारवाई करण्यात आली. जाधव यांच्या सापळा पथकात पोलीस हवालदार संदीप वणवे, पोलीस हवालदार ज्योती शार्दुल यांचा समावेश होता.
२५ वर्षीय तक्रारदार शासनमान्य देशी दारू विक्रेता असून त्याचा व्यवसाय सुरळीत चालू देण्यासाठी श्रीरामपूर भरारी पथकाचा सहाय्यक दुय्यम निरीक्षक शेख याने अकरा हजार रुपये लाचेची मागणी केली होती. त्यानंतर तक्रारदाराने शेख याच्या विरोधात नाशिकच्या लाच लुचपत प्रतिबंधक विभागाकडे तक्रार केली होती. तक्रारीचे पडताळणी झाल्यावर लाच लुचपत विभागाच्या अधिकाऱ्यांनी लाचखोर शेख याला पकडण्यासाठी कोपरगावमध्ये सापळा लावला होता.
तक्रारदाराकडून ११ हजार रुपयांची लाच स्वीकारताना शेख याला पथकाने रंगेहात पकडले. शेख याच्याविरुद्ध कोपरगाव पोलीस ठाण्यात गुन्हा दाखल करण्याचे काम सुरू होते.
