शुक्रवार, दि. ३ मे
पोटगीपोटी शेतजमिनीचा ताबा मिळवण्यासाठी न्यायालयात दावा करणाऱ्या पत्नीचा न्यायालयाच्या परिसरात चाकूने भोसकून खून करणाऱ्या पतीसह चार जणांना वैजापूर न्यायालयाने जन्मठेप व पाच हजार रुपये दंडाची शिक्षा सुनावली.
अतिरिक्त जिल्हा व सत्र न्यायाधीश एम. मोयिऊद्दीन एम. ए. यांनी हा निकाल दिला. ३ ऑक्टोबर २०२० मध्ये घडलेल्या या खुनाच्या घटनेत केशरबाई कारभारी गवळी (८०) रा. भिंगी बोरसर या वृद्ध महिलेचा मृत्यू झाला होता.
या प्रकरणात न्यायालयाने मुख्य आरोपी कारभारी किसन गवळी (८०), त्याची दोन मुले भारत कारभारी गवळी (४७), अतुल कारभारी गवळी (२१) सर्व रा. घायगाव ता. वैजापूर व त्यांचा नातेवाईक रघुनाथ जगन्नाथ सरोवर (३०) रा. गारज यांना दोषी ठरवून खुनाच्या आरोपखाली जन्मठेपेची शिक्षा ठोठावली आहे.
या प्रकरणाची अधिक माहिती अशी, कारभारी किसन गवळी याने मयत केशरबाई यांच्याशी फारकत घेऊन बिजलाबाई या दुसऱ्या महिलेशी लग्न केले. कारभारी याने पोटगीपोटी केशरबाई यांना चार एकर ३३ गुंठे जमीन दिली होती. पण या जमिनीचा ताबा मिळाला नसल्याने केशरबाईने जमिनीचा ताबा मिळवण्यासाठी वैजापूर न्यायालयात दावा दाखल केला होता.
३ ऑक्टोबर २०२० रोजी केशरबाई या आपला नातू किसन तांबे याच्या सोबत न्यायालयात पूर्वेकडील प्रवेशद्वाराजवळ वकिलांची वाट बघत बसल्या असताना चौघे आरोपी तेथे आले व त्यातील तिघांनी दोघांना धरले व कारभारी गवळी याने सोबत आणलेल्या चाकूने केशरबाई यांच्यावर सपासप वार करून ठार केले.
तपास अधिकारी आर. बी. जाधवर यांनी या घटनेचा तपास करून न्यायालयात दोषारोप पत्र दाखल केले. सुनावणीच्या वेळी सरकार पक्षातर्फे सहाय्यक सरकारी वकील नानासाहेब जगताप यांनी अकरा साक्षीदार तपासले. साक्षी पुराव्यानंतर सरकार पक्षाने गुन्हा सिद्ध केल्याने जिल्हा व सत्र न्यायाधीश एम मोयीयोद्दीन एम. ए. यांनी सर्व आरोपीना खुनाच्या आरोपाखाली जन्मठेप व पाच हजार रुपये दंडाची शिक्षा सुनावली.
