नाशिक: सात वर्षांपूर्वी एका अल्पवयीन मुलीचा विनयभंग करणाऱ्या नराधमाला नाशिकच्या जिल्हा व सत्र न्यायालयाने ५ वर्षे सश्रम कारावासाची आणि दंडाची शिक्षा सुनावली आहे. किशोर दिनकर सोनवणे (वय २९, रा. महाकाली चौक) असे शिक्षा झालेल्या आरोपीचे नाव आहे.
ही घटना २ मे २०१९ रोजी नाशिकमधील सिडको परिसरातील साईबाबानगर, महाकाली चौक येथे घडली होती. पीडित अल्पवयीन मुलगी घरासमोर इतर मुलांसोबत खेळत होती. यावेळी आरोपी किशोर सोनवणे याने घराच्या गच्चीवरून एक उशी खाली फेकली. मुलीला ती उशी घेऊन गच्चीवर येण्यास सांगून, तिच्या अजाणतेपणाचा गैरफायदा घेत आरोपीने तिचा विनयभंग केला. मुलीने घडलेला सर्व प्रकार आपल्या आईला सांगितल्यानंतर, अंबड पोलीस ठाण्यात पोक्सो (POCSO) कायद्यांतर्गत गुन्हा दाखल करण्यात आला होता.
या खटल्याची सुनावणी जिल्हा व सत्र न्यायाधीश आर. एन. पांढरे यांच्यासमोर झाली. सरकारी पक्षातर्फे ॲड. भानूप्रिया पेठकर यांनी प्रभावीपणे युक्तिवाद केला. त्यांनी न्यायालयात सिद्ध केले की, आरोपीने अत्यंत वाईट हेतूने मुलीला गच्चीवर बोलावून हे कृत्य केले होते.
तत्कालीन पोलीस उपनिरीक्षक सविता गव्हाणे यांनी या प्रकरणात सबळ पुरावे गोळा करून न्यायालयात दोषारोपपत्र दाखल केले होते. पीडिता, पंच आणि साक्षीदारांची साक्ष तसेच पोलिसांनी सादर केलेले पुरावे ग्राह्य धरून न्यायालयाने आरोपीला दोषी ठरवत ५ वर्षांच्या सक्तमजुरीची शिक्षा सुनावली.
