रविवार, दि. ५ मे
राज्याचे महसूल मंत्री राधाकृष्ण विखे यांना सत्ता बदलाचे वारे लवकर कळतात, असा टोला लगावत ‘त्यांना पक्षात घेताना निश्चितपणे मला विचारले जाईल’, असे काँग्रेसचे ज्येष्ठ नेते बाळासाहेब थोरात यांनी म्हटले आहे.
वंचित बहुजन आघाडीचे अध्यक्ष प्रकाश आंबेडकर यांनी पाथर्डी (अहमदनगर) मधील एका सभेत शनिवारी राज्याचे महसूल मंत्री राधाकृष्ण विखे व त्यांचे पुत्र सुजय विखे दोन वेळा काँग्रेस अध्यक्ष मल्लिकार्जुन खरगे यांना भेटल्याचा तारीख आणि वेळेनिशी दाखला देत बाळासाहेब थोरात यांच्यासाठी ही वॉर्निंग बेल असल्याचे व थोरात यांचा आता तोंडाशी आलेला घास हिरावला जाण्याची शक्यता बळावली असल्याचे म्हटले होते.
या संदर्भात महाविकास आघाडीच्या उमेदवाराच्या प्रचारासाठी नगरमध्ये आलेल्या थोरात यांना प्रश्न विचारला असता ते म्हणाले, या संदर्भात मलाही थोडी थोडी माहिती मिळाली होती, मात्र सगळ्याच गोष्टी उघड करायच्या नसतात. विखे यांना सत्ता बदलाचा अंदाज लवकर येतो. मात्र त्यांचा पक्षप्रवेश मला विचारल्याशिवाय होणार नाही.
या अगोदर देखील या कुटुंबाने गेल्या पंधरा वर्षात अनेक वेळा पक्ष बदललेले आहे. जिथे सत्ता तिथे जातात असा देखील टोला थोरात यांनी यावेळी विखेंना लगावला.
नगरची जागाही महाविकास आघाडीला मिळेल…
राज्यभरात महाविकास आघाडीला अतिशय चांगले वातावरण आहे. विदर्भ, मराठवाड्यातील क्वचित एखाद्या जागेचा अपवाद वगळता उर्वरित जागा महाविकास आघाडीला मिळतील. नगरचे महाविकास आघाडीचे उमेदवार निलेश लंके सामान्य कुटुंबातून आलेले आहे. अनेक संस्था ताब्यात असलेल्या, आर्थिक ताकद आणि मोठे यंत्रणा असलेल्या एका धनदांडग्या उमेदवारासोबत त्यांची लढत आहे. त्यांच्या पराभवासाठी भाजप आणि उमेदवाराने या मतदारसंघात दिग्गज नेत्यांच्या सभा घेण्याचा सपाटा लावला याचा अर्थ लंके यांचा विजय येथून निश्चित असल्याचे देखील थोरात म्हणाले.
