शुक्रवार, दि. १० मे
महिलेला जबरदस्तीने दारू पाजून तिच्यावर आळीपाळीने बलात्कार करणाऱ्या सुरेश लहानू नाईक आणि विशाल कृष्णा म्हात्रे या दोघांना जिल्हा न्यायालयाने प्रत्येकी १० वर्ष कैद आणि १५ हजार रुपये दंडाची शिक्षा सुनावली आहे.
अलिबाग तालुक्यातील तळाशेत गावच्या हद्दीत वडवली रस्त्यावर नेटको कंपनीच्या टेकडीवर रविवारी १९ डिसेंबर २०२० रोजी रात्री सव्वा दहा वाजण्याच्या सुमारास ही घटना घडली होती. पीडित महिला तिच्या मुलीकडे तळाशेत वाडीवर गेली असता ती एकटी असल्याचा फायदा घेत सुरेश लहानू नाईक आणि विशाल कृष्णा म्हात्रे यांनी तिला पाठीमागून पकडून झाडाझुडपात खेचत नेले. तेथे तिला जबरदस्तीने दारू पाजून दोघांनी तिचे कपडे काढून तिच्यावर आळीपाळीने बलात्कार केला होता.
या संदर्भात पोयनाड पोलीस ठाण्यात आरोपी विरुद्ध भारतीय दंडविधान संहितेच्या विविध कलमाअंतर्गत गुन्हा दाखल करण्यात आला होता. अलिबागच्या पोलीस उप अधीक्षक सोनाली कदम आणि त्यांच्या सहकाऱ्यांनी या प्रकरणी जलद तपास करत अलिबाग न्यायालयात दोन्ही आरोपी विरुद्ध दोषारोपपत्र दाखल केले होते.
अलिबाग येथील जिल्हा न्यायाधीश ए. एस. राजंदेकर यांच्यासमोर या खटल्याचे कामकाज चालले. या खटल्यात विशेष शासकीय अभियोक्ता स्मिता धुमाळ-पाटील यांनी १५ साक्षीदारांच्या साक्षी नोंदविल्या. यात फिर्यादी, पीडित साक्षीदार, रासायनिक विश्लेषक, अलिबागचे नायब तहसीलदार, वैद्यकीय अधिकारी, प्राथमिक तपास अधिकारी आणि पोलीस उपअधीक्षक यांच्या साक्षी महत्त्वाच्या ठरल्या.
बचाव पक्षाचा आणि सरकारी वकिलांचा युक्तिवाद ऐकल्यानंतर न्यायालयाने दोन्ही आरोपींना दोषी ठरवत प्रत्येकी दहा वर्ष कैदेची शिक्षा आणि प्रत्येकी दहा हजार रुपये दंड ठोठावला आहे.
