मंगळवार, दि. १४ मे
शिक्षक मतदार संघातील दोन आणि पदवीधर मतदारसंघातील दोन अशा चार जागांवर निवडणूक आयोगाकडून १० जूनला निवडणुक घेतली जाणार असल्याची घोषणा करण्यात आली होती. मात्र आता या निर्णयात बदल करण्यात आला असून नाशिकसह चारही मतदार संघाच्या निवडणुका अनिश्चित काळासाठी लांबणीवर पडल्या आहे.
७ जुलै २०२४ रोजी नाशिक विभाग शिक्षक मतदार संघाचे आमदार किशोर भिकाजी दराडे, मुंबई विभाग शिक्षक मतदार संघातील आमदार कपिल पाटील यांच्यासह विधान परिषदेतील मुंबई पदवीधर मतदारसंघाचे आमदार विलास पोतनीस व कोकण पदवीधर मतदारसंघाचे आमदार निरंजन डावखरे यांचा कार्यकाल संपत असल्याने या चारही मतदारसंघात निवडणुकीचा निवडणूक आयोगाने ८ मे रोजी कार्यक्रम जाहीर केला होता. त्याचबरोबर या निवडणुकीची आचारसंहिता देखील जारी करण्यात आली होती.
मात्र आता जून महिन्यात होणाऱ्या विधान परिषदेच्या पदवीधर व शिक्षक मतदार संघाच्या चार जागांवरील निवडणूक पुढे ढकलण्यात आल्याचे निवडणूक आयोगाने जाहीर केले आहे. राज्यातील शाळा, महाविद्यालयांना सध्या सुट्ट्या आहेत त्यामुळे या निवडणुका पुढे ढकलण्यात याव्यात, अशी विनंती राज्यातील शिक्षकांच्या शिष्टमंडळाने राज्याचे निवडणूक प्रमुख एस. चोकलिंगम यांच्याकडे केली होती. त्यांच्याकडून सदरचे निवेदन केंद्रीय निवडणूक आयोगाला पाठविण्यात आले होते.
शिष्टमंडळाच्या या निवेदनाचा विचार करत निवडणूक आयोगाने निवडणुका पुढे ढकलण्याचा निर्णय दिला आहे. यासंदर्भात निवडणूक आयोगाचे सेक्रेटरी सुमन कुमार दास यांनी राज्याच्या मुख्य निवडणूक आयुक्त यांना कळविले असल्याची माहिती मिळाली.
