मंगळवार, दि. १४ मे
लोकसभा निवडणुकीची धामधूम सुरू असतानाच पुण्यातील मतदान संपताच मोठी बातमी समोर आली आहे. राज्याचे मुख्यमंत्री एकनाथ शिंदे यांच्या युवासेनेत मोठी फूट पडली असून अनेक पदाधिकाऱ्यांनी आपल्या पदाचे राजीनामे दिले आहेत. यामुळे मुख्यमंत्री शिंदे यांच्या पक्षाला पुण्यात मोठा धक्का बसला आहे.
पुण्यातील निवडणूक पार पडताच पुणे शहर शिवसेना शिंदे गटातील धुसफुस समोर आली आहे. नुकत्याच झालेल्या लोकसभा निवडणुकीत शिवसेना पदाधिकाऱ्यांना विचारात घेतले नसल्याबद्दल नाराजी व्यक्त करत युवा सेनेच्या पदाधिकाऱ्यांनी पक्ष सोडला आहे. पुण्यात महायुतीकडून शिवसेना पदाधिकाऱ्यांना डावलले जात असल्याची तक्रार गेल्या अनेक दिवसापासून आहे. निवडणुकी दरम्यानही शिंदे गटाच्या कार्यकर्त्यांमध्ये याबाबत नाराजी होती.
मात्र निवडणुकीदरम्यान मतदारांमध्ये वेगळा मेसेज जायला नको याची काळजी घेत निवडणूक संपताच अनेक पदाधिकाऱ्यांनी राजीनामे दिले असून युवा सेनेतील पदाधिकाऱ्यांबरोबरच शिवसेनेची फादर बॉडी देखील राजीनामा देण्याच्या तयारीत असल्याची माहिती मिळते, असे घडले तर ऐन निवडणुकीच्या धामधूमीत मुख्यमंत्री शिंदे यांच्यासाठी हा मोठा धक्का मानला जात आहे.
