बुधवार, दि. २९ मे
५०० रुपयांच्या बनावट नोटा तयार करून त्या चलनात आणणाऱ्या त्रिकूटाला पोलिसांनी पकडले असून आणखी एकाचा शोध सुरू आहे. शेजारच्याच सिन्नरमधील एका हॉटेलमध्ये संशयित आरोपींकडून तयार केल्या जात होत्या. संगमनेरमध्ये देखील या नोटा आल्याची शक्यता वर्तवली जात आहे.
नाशिकच्या अंबड पोलिसांनी ही कारवाई केली. संशयित अशोक अण्णा पगार (वय ४५ वर्ष, रा. मेंढी, ता. सिन्नर) याला ताब्यात घेतल्यानंतर त्याच्याकडे केलेल्या कसून चौकशीत हा प्रकार समोर आला. पोलिसांनी या प्रकरणी हेमंत लक्ष्मण कोल्हे (वय ३२ वर्ष, रा. वाशी, नवी मुंबई) याला नाशिकमधून व नंदकुमार तुकाराम मुरकुटे (वय ५२ वर्ष, रा. सिन्नर) याला सिन्नरमध्ये सापळा रचून अटक केली असून चौथा संशयित आरोपी भानुदास वाघ (रा. नांदूर शिंगोटे, सिन्नर) हा फरार झाला आहे पोलीस त्याचा शोध घेत असल्याची माहिती गुन्हे शाखेचे पोलीस ठाण्याचे वरिष्ठ पोलीस निरीक्षक दिलीप ठाकूर यांनी दिली.
पोलिसांनी पकडलेला आरोपींनी फरार असलेल्या आरोपीसह सिन्नरच्या एका हॉटेलमध्ये पाचशे रुपयांच्या या बनावट नोटा एका प्रिंटरच्या साह्याने छापल्याची कबुली दिली असल्याची माहिती पोलिसांकडून देण्यात आली. पोलिसांनी आरोपींनी वापरलेले लॅपटॉप, कलर प्रिंटरसह अन्य काही वस्तू जप्त केल्या आहेत.
पकडलेल्या तिघाही संशयितांना नाशिकच्या जिल्हा व सत्र न्यायालय पुढे नेले असता त्यांना न्यायालयाने पोलीस कोठडी सुनावली. पोलीस निरीक्षक सुनील पवार पुढील तपास करत आहे.
असा लागला छडा …
बनावट नोटा तयार करण्याचे काम चौघे मित्र एकत्रित करत होते. त्यांच्यात भांडण झाल्याने हा प्रकार समोर आला. याबाबत गुन्हे शोध पथकाचे संदीप भुरे यांना माहिती मिळाली होती. त्यांनी याची माहिती वरिष्ठ पोलीस निरीक्षक दिलीप ठाकूर व अन्य अधिकाऱ्यांना दिली. सुरुवातीला मिळालेल्या माहितीच्या आधारे पोलीस पथकाने नाशिकच्या कामटवाडे परिसरात बनावट नोटा बाजारात मूळ व्यवहारात आणण्यासाठी आलेल्या अशोक अण्णा पगार याला पकडले. त्यानंतर त्याच्याकडून मिळालेल्या माहितीच्या आधारे अन्य दोघांना पकडण्यात आले. पकडण्यात आलेल्या संशयित आरोपींकडून पोलिसांनी पाचशे रुपयांच्या ३० बनावट नोटांव्यतिरिक्त मोबाईल मोटरसायकल असा २२ हजार रुपये किमतीचा मुद्देमाल जप्त केला.
