शुक्रवार, दि. ३१ मे
अल्पवयीन मुलीवर सार्वजनिक शौचालयात बलात्कार करणाऱ्या दोघा नराधमांना जिल्हा व सत्र न्यायाधीश मलकापट्टी रेड्डी यांनी २० वर्षे सश्रम कारावास व ४५ हजारांचा दंड अशी शिक्षा सुनावली. वसंत तुकाराम गांगोडे (वय ३५), हरिदास ऊर्फ सोनू पांडुरंग राऊत (२०) अशी शिक्षा झालेल्या आरोपींची नावे आहेत.
नाशिकच्या गंगापूर पोलीस ठाण्याच्या हद्दीत २०१९ मध्ये ही घटना घडली होती. आरोपी गांगोडे व राऊत यांनी एका अल्पवयीन मुलीला सार्वजनिक शौचालयात एकटे गाठले होते. नैसर्गिक विधीसाठी ती शौचालयात गेली असता गांगोडे याने आतमध्ये जाऊन कडी लावून घेत बळजबरीने अत्याचार केले होते. तसेच राऊत याने पीडितेसोबत तिच्या राहत्या जाऊन अत्याचार केला होता.
याप्रकरणी गंगापूर पोलिसांनी बलात्कार व ‘पोक्सो’ अंतर्गत गुन्हा दाखल केला. या गुन्ह्याचा तपास तत्कालीन सहायक पोलीस निरीक्षक प्रवीण सूर्यवंशी यांनी करीत सबळ पुरावे गोळा करून नाशिकच्या जिल्हा व सत्र न्यायालयात आरोपींविरोधात दोषारोपपत्र दाखल केले होते.
जिल्हा न्यायाधीश मलकापट्टी रेड्डी यांच्यासमोर या खटल्याची सुनावणी सुरू सरकारी अभियोक्ता सुलभा सांगळे यांनी प्रभावी युक्तिवाद केला.
न्यायालयाने युक्तिवाद व तपासी अंमलदाराने सादर केलेले पुरावे, फिर्यादी, पंच, साक्षीदार यांनी दिलेल्या साक्षीला अनुसरून दोन्ही आरोपींना दोषी धरले. दंडाची रक्कम न भरल्यास प्रत्येकी तीन व सहा महिन्यांचा अतिरिक्त साधा कारावास भोगावा लागू शकतो, असे न्यायालयाने निकालात म्हटले आहे.
