शनिवार, दि. १ जून
नाशिकच्या विभागीय महसूल आयुक्तपदी बदली होताच डॉ. प्रवीण गेडाम यांनी महसूल आयुक्त पदाचा कार्यभार मावळते आयुक्त राधाकृष्ण गमे यांच्याकडून स्वीकारला. गेडाम आता नाशिकचे नवे महसूल आयुक्त असतील.
गमे सेवानिवृत्त झाल्याने त्यांच्या रिक्त होणाऱ्या जागेवर राज्य शासनाने गेडाम यांची नियुक्ती केली. यापूर्वी नाशिकमध्ये महापालिका आयुक्त राहिलेले गेडा म सध्या कृषी आयुक्त म्हणून कार्यरत होते.
डॉ. गेडाम राज्यात कर्तव्यदक्ष अधिकारी म्हणून परिचित आहे. राज्यभरात गाजलेला जळगावचा घरकुल घोटाळा गेडाम यांनी बाहेर काढला होता. याच प्रकरणात माजी आमदार सुरेश जैन यांच्यासह अन्य बड्या राजकीय नेत्यांना तुरुंगवास भोगावा लागला होता. गेडाम यांच्या अगदी सुरुवातीच्या काळात त्यांनी संगमनेर नगर परिषदेत मुख्याधिकारीपदाचा कार्यभार देखील सांभाळला होता. यावेळी त्यांनी संगमनेरमध्ये राबविलेली अतिक्रमण हटाव मोहीम आजही संगमनेरकरांच्या स्मरणात आहे.
केंद्र सरकारच्या महत्त्वाकांक्षी ठरलेल्या आयुष्यमान भारत योजनेच्या मुख्य कार्यकारी अधिकारी पदाची जबाबदारी देखील त्यांनी उल्लेखनीय रित्या पार पाडली. या योजनेच्या अंमलबजावणीसाठी मोदी सरकारने त्यांना केंद्रात बोलावून घेतले होते. त्यांनी परदेशात हॉवर्ड विद्यापीठातून पदवी संपादन केली आहे.
नाशिकला महसूल आयुक्त म्हणून आता खमक्या अधिकारी मिळाल्याने महसूल विभागात मोठे बदल होण्याची चिन्हे आहेत.
