बुधवार, दिनांक ५ जून २०२४
सहाय्यक पोलीस निरीक्षकासाठी ४० हजार रुपयांची लाच स्वीकारताना न्यायालयात पैरवी कर्मचारी असलेल्या पोलीस कर्मचाऱ्याला लाच लुचपत विभागाच्या अधिकाऱ्यांनी सापळा लावत रंगेहाथ पकडले आहे. यामुळे पोलिसांचा लाचेचा नवा कारनामा समोर आला.
सागर कुमार टकले (वय ३७ वर्ष, कोपरखैरणे पोलीस स्टेशन, नवी मुंबई) व प्रज्ञेश नरेंद्र कोठेकर (वय ४२ वर्ष, कोपरखैरणे पोलीस स्टेशन, नवी मुंबई) अशी लाचखोर सहाय्यक पोलीस निरीक्षक व पोलीस नाईक असलेल्या अधिकाऱ्यांची नाव आहेत.
कोपरखैरणे पोलीस ठाण्यात तक्रारदाराच्या चुलत्यांवर दाखल असलेल्या गुन्ह्यांमध्ये पोलीस कोठडीत असलेल्या चुलत्याला कोठडीची मुदत संपल्यानंतर जामीन अर्जावरील सुनावणी दरम्यान वेळेत म्हणणे (Say) देण्यासाठी तसेच उर्वरित गुन्ह्याच्या तपासात मदत करण्याकरिता सहाय्यक पोलीस निरीक्षक टकले याने तक्रारदाराकडे एक लाख रुपये लाचेची मागणी केली होती.
यासंदर्भात तक्रारदाराने नवी मुंबईच्या लाच लुचपत विभागाशी संपर्क साधून तक्रार दाखल केली होती. त्यानंतर लाच लुचपतच्या अधिकाऱ्यांनी या तक्रारीची मंगळवारी पडताळणी केली असता तक्रारीत तथ्य असल्याचे आढळून आले.
तडजोडीअंती ४० हजार रुपये देण्याचे निश्चित झाल्यावर ही कारवाई करण्यात आली. सहाय्यक पोलीस निरीक्षक टकले याने लाचेची रक्कम न्यायालयात भैरवी कर्मचारी असलेल्या कोपरखैरणे पोलीस स्टेशनच्या पोलीस नाईक प्रज्ञेश नरेंद्र कोठेकर यांच्याकडे देण्यास सांगितले होते.
पोलीस निरीक्षक संतोष पाटील यांच्या नेतृत्वाखाली पोलीस हवालदार जाधव, पोलीस नाईक, अहिरे, पोलीस शिपाई मंगेश चव्हाण, माने, चौलकर, बासरी, सावंत, विश्वासराव आदींनी आरोपींना पकडण्यासाठी सापळा रचत कोठेकर यास पैसे घेताना रंगेहाथ पकडले. दोन्ही आरोपी विरोधात गुन्हा दाखल करण्याची कार्यवाही सुरू असल्याची माहिती मिळते.
