गुरुवार, दि. ६ जून २०२४
नगर विकास मंत्रालयात उपसचिव असलेले अकोले तालुक्यातील अंभोळचे भूमिपुत्र विजय कारभारी चौधरी यांना सहसचिवपदी पदोन्नती मिळाली आहे. महाराष्ट्र राज्याचे अपर सचिव वि. बा. माने यांनी चौधरी त्यांच्या निवडीचे आदेश काढले.
नगर विकास मंत्रालयाचे उपसचिव म्हणून कार्यरत असताना चौधरी यांनी नागरी जमीन कमाल धारणा कायदा निरसिद्ध झाल्यानंतर शासन देयक्षेत्रापोटी सन २०१९ ते २०२३ या कालावधीत योजना धारकांकडून सुमारे ११०० कोटींचा महसूल राज्य शासनाला मिळवून देण्यामध्ये मोलाचे योगदान दिले आहे.
संचालक नगर रचना व अधिनस्त कार्यालयांसाठी सुमारे ११९९ पदांचा सुधारित आकृतीबंध त्यांनी निश्चित केला तसेच गुणवंत अधिकारी व कर्मचारी व कार्यालयांसाठी पुरस्काराची योजना ही तयार केली. मुंबई येथील स्व. बाळासाहेब ठाकरे स्मारकासाठी प्रशासकीय व अर्थसंकल्पीय बाबी विहित मर्यादेत त्यांनी पूर्ण केलेले आहेत मुंबई मेट्रो लाईन ३ करिता सुधारित प्रशासकीय मान्यता तसेच आरे कार विषयीच्या प्रशासकीय व माननीय न्यायालयीन प्रकरणांच्या संदर्भातही त्यांनी काम केले.
चौधरी यांना प्रतिष्ठेचा स्वराज्य अभियंता हिरोजी इंदुरीकर गुणवंत अभियंता पुरस्कार प्राप्त झालेला आहे. त्याशिवाय अकोले गौरव पुरस्कार, महाराष्ट्र राज्य मराठी पत्रकार संघ, मुंबई यांचा आदर्श अधिकारी पुरस्कार प्राप्त झालेला आहे. गावाच्या विकासासाठी ते नेहमी योगदान देत असतात. आदिवासी दुर्गम अकोले तालुक्यात पर्यटन विकास व्हावा यासाठीही ते प्रयत्नशील आहेत. चौधरी यांचे समाजातील विविध स्तरांमधून अभिनंदन होत आहे.
