गुरुवार दिनांक १३ जून २०२४
वेतनश्रेणीच्या फरकाच्या बिलाचे काम करून देण्यासाठी केलेल्या मदतीच्या मोबदल्यात ५० हजार रुपयांची लाच घेणाऱ्या मुख्याध्यापिकेला नगरच्या लाच लुचपत विभागाच्या पथकाने रंगेहात पकडले.
श्रीमती संगीता नंदलाल पवार असे लाचखोर मुख्याध्यापिकेचे नाव आहे. नगरच्या श्रीरामपूरमध्ये लाचलुचपत विभागाने ही कारवाई केली. गेल्या आठवड्यात शाळा सोडल्याच्या दाखल्याची दुय्यम प्रत देण्यासाठी तीन हजार रुपयांची लाच घेणाऱ्या हेडमास्तरला शेजारच्या बीड जिल्ह्यात पकडले होते त्या पाठोपाठ आता नगर जिल्ह्यातील मुख्याध्यापिकेवर लाचेची कारवाई झाली आहे.
तक्रारदाराची पत्नी श्रीरामपूरच्या सुभद्राबाई बाबुराव गायकवाड प्राथमिक शाळेत उपशिक्षिका म्हणून कार्यरत आहे. सदरची शाळा अनुदानित असून तक्रारदाराच्या पत्नीला २०१५ ते २०२२ या कालावधीतील वरिष्ठ वेतन श्रेणीच्या फरकाची रक्कम १ लाख ६२ हजार ३६७ रुपये मिळाली आहे. तक्रारदाराच्या पत्नीच्या वरिष्ठ वेतनश्रेणीच्या फरकाचे बिलाचे काम करून देण्यासाठी केलेल्या मदतीच्या मोबदल्यात लाचखोर मुख्याध्यापिका श्रीमती संगीता पवार घेणे तक्रारदाराकडे पन्नास हजार रुपये लाचेची मागणी केली होती.
त्यामुळे तक्रारदाराने या संदर्भात नगरच्या लाचलुचपत विभागाकडे तक्रार केली. एसीबीच्या अधिकाऱ्यांनी तक्रारीची पडताळणी केली असता मुख्याध्यापिका पवार हिने पन्नास हजार रुपये मागणी करत तडजोडीअंती ४५ हजार रुपये घेण्याचे मान्य केले. त्यामुळे बुधवारी श्रीरामपूरमध्ये शंकरराव गायकवाड ग्रामीण एज्युकेशन संस्था संचलित सुभद्रा मुलींच्या वसतिगृहात मुख्याध्यापिका पवार हिच्या विरुद्ध सापळा लावण्यात आला असता तक्रारदाराकडून लाचेची रक्कम स्वीकारताना तिला रंगेहात पकडण्यात आले. पवार हिच्याविरुद्ध श्रीरामपूर शहर पोलीस ठाण्यात गुन्हा दाखल करण्यात आला आहे.
लाच लुचपत विभागाचे पोलीस उपाधीक्षक प्रवीण लोखंडे यांच्या नेतृत्वाखाली पोलीस अंमलदार बाबासाहेब कराड, किशोर लाड, वैशाली शिंदे, अरुण शेख यांच्या पथकाने ही कारवाई केली.
