गुरुवार, २० जून
भरधाव वेगाने दुचाकीवरून आलेल्या दोघांनी तलाठी महिलेच्या गळ्यातील २२ ग्रॅम वजनाचे सोन्याचे मिनी गंठण ओढून नेल्याची घटना संगमनेर मध्ये समनापुर गावच्या शिवारात घडली. शहर पोलिसांनी अज्ञात चोरट्यांविरुद्ध गुन्हा दाखल केला आहे.
या संदर्भात चंदनापुरी (संगमनेर) येथे कार्यरत असलेल्या तलाठी भारती अशोक भुरके यांनी दिलेल्या फिर्यादीत म्हटले आहे की, मंगळवारी (१८ जून) सायंकाळी स्टाफच्या मैत्रिणी समवेत संगमनेर तालुक्यातील मेंढवन येथे जात होत्या. यावेळी त्या त्यांच्या दुचाकी वर एकटाच असताना कोल्हार-घोटी मार्गावर समनापुर गावचे हद्दीत किसान ट्रॅक्टरच्या समोरून जात असताना पाठीमागून एका मोटरसायकलवर आलेल्या दोघा अनोळखी व्यक्ती पैकी पाठीमागे बसलेल्या व्यक्तीने फिर्यादीच्या गळ्यातील मिनी गंठण ओढून तोडून घेऊन भरधाव वेगाने मोटर सायकलवर निघून गेले.
गेल्या काही महिन्यांपासून संगमनेर व परिसरात महिलांच्या गळ्यातील दागिने लंपास करण्याच्या घटना वारंवार समोर येत आहे. मात्र यातील आरोपी शोधण्यात पोलिसांना सातत्याने अपयश येताना दिसते. शहरातील काही सोनार अशा प्रकारचे चोरीचे दागिने घेत असल्याचा चर्चा वारंवार घडतात. मात्र आरोपी हाती लागत नसल्याने पोलिसांना सोनारापर्यंत पोहोचण्यात अडचणी येत असल्याचे दिसते.
काही दिवसांपूर्वी अशाच एका घटनेत संगमनेरातील काही सुवर्ण व्यावसायिकांची पुणे पोलिसांकडून चौकशी देखील करण्यात आली होती. या प्रकारात नगरच्या स्थानिक गुन्हे शाखेच्या अधिकारी कर्मचाऱ्यांनी देखील मोठ्या प्रमाणात हात धुवून घेतल्याची चर्चा संगमनेरात झाली होती.
