गुरुवार, २० जून
कथित मद्य घोटाळ्याप्रकरणाशी संबंधित मनी लॉन्ड्रिंग प्रकरणी दिल्लीच्या राऊज ऍव्हेन्यू न्यायालयाने मुख्यमंत्री अरविंद केजरीवाल यांना दिलासा दिला आहे. केजरीवाल यांना जामीन मंजूर करण्यात आला असून त्यांच्या जमीन आला स्थगिती देण्याची ईडीची याचिका न्यायालयाने फेटाळून लावल्याने केजरीवाल यांची शुक्रवारी तिहारमधून सुटका होईल.
लोकसभा निवडणुकीच्या प्रचारासाठी केजरीवाल्यांना सर्वोच्च न्यायालयाने २१ दिवसांसाठी जामीन दिला होता. वैद्यकीय कारणावरून केजरीवाल यांनी जामीन वाढ करून देण्याची मागणी मात्र न्यायालयाने फेटाळून लावली होती. त्यांना २ जून रोजी सरेंडर करण्याचे आदेश न्यायालयाने दिले होते. सरेंडर झाल्यापासून ते तिहार तुरुंगात होते.
यानंतर पुन्हा त्यांनी राउज एवेन्यू न्यायालयांत जामिनासाठी याचिका दाखल केली होती. त्यावरील सुनावणी दरम्यान गुरुवारी त्यांना जामीन मंजूर करण्यात आला. विशेष न्या. न्याय बिंदू यांच्या खंडपीठाने केजरीवाल यांना एक लाखांच्या वैयक्तिक जातमुचलक्यावर हा जामीन मंजूर केला. केजरीवालांना जामीन मंजूर झाल्यानंतर या आदेशाला वरच्या न्यायालयात आव्हान देता यावे यासाठी ईडीने बेल बॉण्डवर सही करण्यासाठी ४८ तासांची वेळ मागितली होती. मात्र, या आदेशाला स्थगिती दिली जाणार नाही, असे न्यायालयाने सांगितले. हा बेल बॉण्ड उद्या, शुक्रवारी ड्युटी न्यायाधीशांसमोर ठेवला जाईल. यामुळे केजरीवाल यांची शुक्रवारी तिहारमधून सुटका होईल.
दरम्यान, केजरीवाल यांच्या सुटकेआधी ईडी त्यांच्या जामिनाला दिल्ली उच्च न्यायालयात आव्हान देऊ शकते. २१ मार्च पासून केजरीवाल अटकेत आहेत.
