बुधवार, २६ जून
प्राथमिक आरोग्य केंद्रातील कनिष्ठ सहाय्यकाचे बिल स्वाक्षरी करून जिल्हा आरोग्य अधिकाऱ्यांकडे पाठविण्यासाठी दहा टक्के प्रमाणे लाच मागणाऱ्या मेडिकल ऑफिसर विरुद्ध लाच लुचपत विभागाने गुन्हा दाखल केला असून पोलिसांनी त्याला ताब्यात घेतले आहे.
डॉ. अंबर श्रीराम मडावी (वय ४४ वर्ष) असे लाचखोर मेडिकल ऑफिसरचे नाव असून त्याची नेमणूक वैद्यकीय अधिकारी म्हणून बाराभाटीच्या आयुर्वेदिक दवाखान्यात आहे. याशिवाय त्याच्याकडे महागाव तालुका अर्जुनी मोरगाव येथील प्राथमिक आरोग्य केंद्राचा अतिरिक्त कार्यभार आहे.
तक्रारदार हे प्राथमीक आरोग्य केंद्र महागाव येथे कनिष्ठ सहाय्यक म्हणून कार्यरत असून त्यांच्या वेतन निश्चिती, नक्षलभत्ता, प्रोत्साहन भत्ता व अतिरिक्त घरभाडे भत्ता थकबाकीच्या फरकाचे ६ लाख ७ हजार ३२० रुपये रकमेचे बील स्वाक्षरी करून जिल्हा आरोग्य अधिकारी, जिल्हा परिषद गोंदिया यांच्या कार्यालयात पाठविण्याकरीता बिलाच्या रकमेवर १०℅ प्रमाणे ६० हजार रुपये लाच मागणी करीत असल्याबाबत लाच लुचपत विभागाकडे तक्रार प्राप्त झाली होती.
दि. ११ जुन व १२ जुन रोजी आरोपीने लाच म्हणून ६० हजार रुपयाची मागणी केली. ६ लाख ७ हजार ३२० रूपये रकमेवर १०% प्रमाणे टक्केवारी मागितली आहे. तडजोडीअंती लाच ४८ हजार रुपये ८% प्रमाणे देणे ठरले मात्र तक्रारदार यांना लाच द्यायची इच्छा नसल्यामुळे त्यांनी एसीबीकडे तक्रार दाखल केली. त्यानंतर लाच लुचपत विभागाने सोमवारी (२४ जुन) अर्जुनी मोरगाव (गोंदिया) येथील तालुका आरोग्य अधिकारी कार्यालयात या लाच प्रकरणी कारवाई केली.
पोलिसांनी आरोपीला ताब्यात घेतले असून अर्जुनी मोरगाव येथील पोलीस ठाण्यात डॉक्टर मडावी याच्या विरुद्ध गुन्हा दाखल करण्यात आला आहे. लाचलुचपतचे पोलीस उपाधीक्षक विलास काळे, पोलीस निरीक्षक अतुल तवाडे, पोलीस निरीक्षक उमाकांत उगले, पोलीस हवालदार संजय कुमार बोहरे, महेश काहालकर, पोलीस शिपाई संतोष शेंडे, संतोष बोपचे, अशोक कापसे, महिला पोलीस शिपाई संगीता पटले, रोहिणी डांगे, चालक पोलीस शिपाई दीपक बाटबर्वे यांच्या पथकाने ही कारवाई केली.
