दोघा लाचखोरांच्या शोधासाठी पथके रवाना
लाचखोर जावळेच्या आयुक्तपदी नेमणुकीची शिफारस केली होती या आमदाराने तर या तत्कालीन मंत्र्याने केली होती नियुक्ती
शुक्रवार, २८ जून
तब्बल आठ लाखाची लाच मागणाऱ्या अहमदनगर आयुक्त डॉ. पंकज जावळे आणि त्यांचा स्वीय सहाय्यक श्रीधर देशपांडे यांच्यावर लाच मागणीचा गुन्हा नगरच्या तोफखाना पोलीस ठाण्यात दाखल करण्यात आला आहे. दरम्यान दोघेही लाचखोर अधिकारी फरार झाले असून त्यांच्या शोधासाठी पथके रवाना करण्यात आली आहेत. तर देशपांडे यांच्या घरी घेतलेल्या घरझडतीत लाच लुचपतच्या पथकाला घबाड हाती लागल आहे.
डॉ. जावळे आणि देशपांडे यांच्या मागावर लाच लुचपतची तीन पथके विविध ठिकाणी कार्यरत झाली आहे. दोन्ही अधिकाऱ्यांचे मोबाईल नॉट रिचेबल येत आहे. दुसरीकडे जावळे यांचा स्वीय सहाय्यक श्रीधर देशपांडे यांच्या घराची घरझडती नगर लाच लुचपत विभागाच्या पोलीस निरीक्षक श्रीमती छाया देवरे यांच्या पथकाने गुरुवारी सायंकाळी घेतली असता त्यांना रोकड रकमेसह अन्य काही महत्त्वाची माहिती हाती लागली आहे.
घरझडतीमध्ये ९३ हजार रुपयांची रोख रक्कम, साडे आठ तोळयांचे सोन्याचे दागिने तसेच एकंदरीत नऊ मालमत्ता संदर्भातील कागदपत्रे मिळुन आली आहेत. या मालमत्ता नगर शहरातील उच्चभ्रु वस्तीमध्ये, उपनगरांमध्ये खरेदी केल्याची कागदपत्रे मिळत आहे. तसेच बीड जिल्हयात देखील त्याने शेतजमीन खरेदी केल्याचे दिसुन येत आहे.
डॉ. जावळेंसाठी राष्ट्रवादीच्या आमदाराने केली होती शिफारस…
राष्ट्रवादी काँग्रेस अजित पवार पक्षाचे आमदार संग्राम जगताप यांनी महाविकास आघाडी सरकारच्या काळात प्राजक्त तनपुरे नगरविकास राज्यमंत्री असताना अकोले मनपामधे उपायुक्त असलेले पंकज जावळे यांना अहमदनगर महानगरपालिकेच्या आयुक्तपदी नियुक्तीची शिफारस केली होती. त्यानुसार जुलै २०२२ ला डॉ. जावळे मनपात आले. नगरसेवकांचा कालावधी २७ डिसेंबर २०२३ ला संपण्याच्या एक दिवस आधी म्हणजे २६ डिसेंबरला आ. जगताप यांनी नगरविकास प्रधान सचिवांना डॉ. जावळे यांना प्रशासक पदाचा कार्यभार सुपूर्द करण्याची मागणी केली होती. आ. जगताप यांनी अशा भ्रष्ट अधिकाऱ्याची शिफारस करायला नको होती, असे सामाजिक कार्यकर्ते शाकीर शेख म्हणाले.
