शनिवार, २९ जून
संगमनेर नगरपालिकेच्या कॉटेज रुग्णालयाच्या गलथान आरोग्य सेवेची शिवसेनेने (उद्धव बाळासाहेब ठाकरे) पोलखोल करत त्यांनी दिलेल्या आंदोलनाच्या इशाऱ्यानंतर यासंबंधीचे वृत्त ‘महाराष्ट्र संवाद न्यूज’ने शनिवारी सकाळी आपल्या वेब पोर्टलच्या माध्यमातून प्रसिद्ध करताच आरोग्य यंत्रणा खडबडून जागी झाली. तालुका आरोग्य अधिकाऱ्यांनी संबंधितांची शिवसेनेचे माजी शहरप्रमुख अमर कतारी यांच्यासह पदाधिकाऱ्यांसमवेत रुग्णालयाच्या मेडिकल ऑफिसर व कर्मचाऱ्यांची प्राथमिक आरोग्य केंद्रात तातडीची बैठक घेत संबंधितांचे चांगलेच कान उघडणी करत कामकाजाबाबत झाडाझडती घेतली.
तालुका आरोग्य अधिकारी डॉक्टर सुरेश घोलप, शिवसेनेचे माजी शहर प्रमुख अमर कतारी, युवा सेनेचे जिल्हाप्रमुख अमित चव्हाण, उपशहर प्रमुख इम्तियाज शेख यांच्यासमोर सर्व कर्मचारी स्टाफ यांना भविष्यात अशा पद्धतीच्या चुका होणार नाही यासंदर्भात संबंधितांना सूचना केल्या.
कर्मचाऱ्यांनी, अधिकाऱ्यांनी वेळेत कामावर येऊन कामाच्या वेळेत पूर्ण वेळ काम करणे, गृहभेटी, लसीकरण करण्याबाबत सूचना करण्यात आल्या. लाभार्थ्यांना लसीकरणाबाबत माहिती देणे, वेळेत लसीकरण करणे, लसीकरणाच्या परिणामाबाबत सूचना देणे, लसीकरणानंतर लाभार्थ्याचा फॉलोअप घेणे, लसीकरणापासून कोणीही वंचित राहणार नाही याची खबरदारी घेणे, रुग्णांसोबत चांगले वागावे, कार्यक्षेत्रात भेटी देऊन कंटेनर सर्वे, खासगी डॉक्टर भेटी, सात रोग प्रतिबंधक उपाय योजना राबविण्यासंदर्भात डॉक्टर घोलप यांनी संबंधितांना सूचना केल्या.
मागण्या मान्य झाल्याने समाधानी… रुग्णालयात सुरू असलेल्या चुकीच्या पद्धतीच्या कामामुळे नागरिकांच्या चांगल्या आरोग्यासाठी शिवसेनेने निवेदन देत आंदोलनाचा इशारा दिला होता. मात्र चर्चेतून समाधानकारक तोडगा निघाला आहे. मागण्या मान्य झाल्याने आम्ही समाधानी आहोत. – अमर कतारी.
