शनिवार, २९ जून
गौण खनिज पथकावर वाळू तस्करांनी केलेल्या हल्ल्यानंतर जिल्ह्यात महसूल प्रशासनाच्या कर्मचाऱ्यांनी काम बंद आंदोलन सुरू केले. यामुळे विद्यार्थी, शेतकरी, नागरिकांची गैरसोय होत आहे. तसेच अधिवेशन चालू असल्याने तातडीने काम बंद आंदोलन मागे घ्यावे अशा सूचना केल्यानंतर शनिवारपासून आंदोलन तात्पुरते स्थगित करण्यात आले असल्याची माहिती समजते. तर श्रीगोंदे प्रकरणी तीन आरोपींना पोलिसांनी ताब्यात घेतले असून त्यांच्याकडे चौकशी सुरू असल्याची माहिती समोर येत आहे.
मात्र या संदर्भात जिल्हाधिकाऱ्यांनी शुक्रवारी रात्री बैठक घेत संबंधित विभागाच्या अधिकाऱ्यांची चांगलीच झाडाझडती घेतली. श्रीगोंदे तालुक्यातील चवरसांगवी येथे वाळू तस्करांवर कारवाई करण्यासाठी गेलेल्या महसूलच्या पथकावर झालेल्या आल्यानंतर जिल्ह्यात त्याचे पडसाद उमटले. जिल्हा तलाठी संघाच्यावतीने जिल्ह्यात सर्वत्र काम बंद आंदोलन सुरू करण्यात आले होते. यामुळे महसूलशी संबंधित कामांकरिता आलेल्या नागरिकांचे विद्यार्थ्यांचे मोठे हाल झाले.
जिल्हाधिकारी सिद्धाराम सालीमठ यांनी याचे गंभीर दखल घेत शुक्रवारी सायंकाळी त्यांच्या दालनात जिल्हा तलाठी संघ व जिल्हा महसूल कर्मचारी संघटना यांच्या समवेत कामबंद आंदोलना संदर्भात बैठक घेतली. यावेळी निवासी उपजिल्हाधिकारी, श्रीगोंदाचे प्रांत अधिकारी, तहसीलदार, पोलीस निरीक्षक उपस्थित होते.
गौण खनिज पथकावर झालेल्या हल्ल्या संदर्भात पोलीस निरीक्षकांनी वेळेत मदत का पुरविली नाही याबाबत विचारणा करत जिल्हाधिकाऱ्यांनी नाराजी व्यक्त केल्याची माहिती समोर येत आहे. यापुढील कारवाईनदरम्यान त्यांनी पोलीस सुरक्षा पुरविण्याबाबत सूचना दिल्या. तसेच संघटनेने पथकासोबत किमान नायब तहसीलदार दर्जाचा अधिकारी असावा, शासकीय वाहन असावे, कारवाईसाठी कायमस्वरूपी बंदोबस्त असावा अशा मागण्या केल्या. पोलीस बंदोबस्ताशिवाय पथकाने कारवाईसाठी जाऊ नये अशा सूचना जिल्हाधिकाऱ्यांनी दिल्या आहे.
तसेच अवैध गौण खनिज उत्खननाबाबत केवळ तलाठी व मंडल अधिकारी यांना जबाबदार न धरता त्या-त्या गावातील सरपंच, स्थानिक नागरिक, पोलीस पाटील, ग्रामसेवक व पोलीस विभागाचे बीट अंमलदार यांच्यावर सुद्धा जबाबदारी निश्चित करावी, केवळ ग्रामदक्षता कमिटी स्थापन करून चालणार नाही तर त्यांनी सुद्धा अवैध गौण खनिज वाहतूक रोखण्यासाठी जबाबदारी पार पाडावी, अशी मागणी यावेळी करण्यात आली.
दरम्यान श्रीगोंदातील हल्ला प्रकरणी मुख्य आरोपी शिवाय तिघा आरोपींना ताब्यात घेण्यात आले असून त्यांची चौकशी सुरू आहे अन्य आरोपींची नावे माहीत असल्यास पथकातील सदस्यांनी कळवावी असे देखील बैठकीत सांगण्यात आले.
