शनिवार, २९ जून
वारंवार गंभीर स्वरूपाचे गुन्हे करणाऱ्या आणि धोकादायक ठरू शकणाऱ्या संगमनेरमधील रवींद्र राधाकिसन डेंगळे याला अहमदनगरचे जिल्हाधिकारी सिद्धाराम सालीमठ यांनी एक वर्षासाठी स्थानबद्ध केले असून डेंगळे याला नाशिकच्या सेंट्रल जेलमध्ये हजर करण्यात आले आहे.
रवींद्र राधाकिसन डेंगळे (वय ३५ वर्ष, रा. निमगावजाळी ता. संगमनेर जि. अहमदनगर हल्ली रा. सायखिंडीफाटा, संगमनेर ता. संगमनेर जि. अहमदनगर) याच्या विरोधात संगमनेर शहर, संगमनेर तालुका, आश्वी पोलीस ठाण्यात अनेक गंभीर गुन्ह्यांची नोंद आहे. झोपडपट्टी दादा, हातभट्टीवाले, औषधे द्रव्य विषयक गुन्हेगार, व्हिडिओचाचे, वाळू तस्कर व अत्यावश्यक वस्तूच्या काळा बाजारात सामील असलेल्या व्यक्ती यांच्या विघातक कृत्यांना आळा घालणे याबाबतच्या अधिनियम अन्वय धोकादायक व्यक्ती या मथळ्याखाली जिल्हाधिकाऱ्यांनी डेंगळे याला एक वर्षासाठी स्थानबद्ध करण्याचे आदेश पारित केले असल्याची माहिती संगमनेरचे पोलीस उपअधीक्षक सोमनाथ वाघचौरे यांनी दिली.
डेंगळे अतिशय आडदांड खुनशी, साहसी, चोरी करण्याचे स्वभावाचा व नंगट स्वभावाचा असून तो नेहमी लोकांमध्ये जोर जबरदस्ती करणे, मारहाण करणे, लोकांच्या खिशातील पैसे काढून घेणे, चोऱ्या करणे, टोळी तयार करणे, दहशत दडपशाहीचा वापर करून लोकांच्या मनात भीतीचे वातावरण निर्माण करत असतो. त्याच्याविरुद्ध आश्वी पोलीस स्टेशन, शहर पोलीस स्टेशन, तालुका पोलीस ठाण्यात चोरी, घरफोडी, जबरी चोरी, गृह अतिक्रमण करून दमदाटी करणे, बेकायदेशीर हत्यार जवळ बाळगणे, चोरी करण्याच्या उद्देशाने रात्रीच्या वेळेस स्वतःचे अस्तित्व लपवित फिरणे, दरोडा घालण्याची तयारी करणे अशा स्वरूपाचे गंभीर गुन्हे दाखल असल्याचे माहिती देण्यात आली.
विविध गुन्ह्यात डेंगळे याला आतापर्यंत अनेकदा अटक करण्यात आली आहे. सदर गुन्ह्यात न्यायालयातून जामीनावर सुटल्यावर तो पुन्हा पूर्वीप्रमाणे गुन्हे करत असल्याने त्याची मनोवृत्ती व कल हा गुन्हेगारी कृत्याकडे असल्याचे दिसत असल्याने तो समाजात अशांतता निर्माण करू शकतो, तो कायद्याला जुमानत नाही त्याच्या मनात कायद्याविषयी कोणताही आदरभाव, वचक राहिला नसल्याने त्याला स्थानबद्ध करण्यात आले आहे.
