गुरुवार ४ जुलै
संगमनेरमधील प्रख्यात उद्योजक राजेश मालपाणी असल्याचे भासत फोनवरून अज्ञात आरोपीने तात्काळ ४९ लाख ६० हजार ५०३ रुपये पाठविण्यास सांगून कर्मचाऱ्यांची फसवणूक करण्याचा प्रयत्न केल्याचा प्रकार संगमनेरमध्ये समोर आला आहे. याप्रकरणी संगमनेर शहर पोलीस ठाण्यात नव्याने बदललेल्या भारतीय न्याय संहिता (BNS) कायद्याद्वारे गुन्हा दाखल करण्यात आला आहे.
बुधवारी सकाळी साडेनऊ वाजण्याच्या दरम्यान घडलेल्या या प्रकारासंदर्भात राजेशप्रसाद दौलतप्रसाद दुबे यांनी रात्री शहर पोलीस ठाण्यात दिलेल्या फिर्यादीत म्हटले आहे की, बुधवारी साडेनऊ वाजता मालपाणी हाऊस मध्ये असताना अज्ञात व्यक्तीने एका मोबाईल क्रमांकावरून दुबे यांना फोन करत फोनवर राजेश मालपाणी असल्याचे भासवत तात्काळ ४९ लाख ६० हजार ५०३ रुपये पाठविण्यास सांगितले. मात्र कर्मचाऱ्याला संशय आल्याने त्यांनी कोणतेही पैसे पाठविले नाही, त्यानंतर उद्योगपती मालपाणी यांच्या नावावर कोणीतरी आपली फसवणूक करत असल्याचे लक्षात आल्यानंतर ही तक्रार दाखल करण्यात आली.
अशा आशयाच्या फिर्यादीवरून संगमनेर पोलिसांनी १ जुलैपासून बदललेल्या भारतीय न्याय संहिता कायद्यानुसार अज्ञात आरोपी विरुद्ध गुन्हा दाखल केला आहे.
पोलीस निरीक्षक भगवान मथुरे यांच्या मार्गदर्शनाखाली संगमनेर शहर पोलीस ठाण्याचे सहाय्यक पोलीस निरीक्षक विश्वास भान्सी याप्रकरणी पुढील तपास करत आहे. भान्सी यांच्याशी संपर्क केला असता ते बाहेरगावी असल्याने अधिक माहिती मिळू शकली नाही.
