गुरुवार,११ जुलै
गांजा तस्करी प्रकरणात शिवसेनेच्या (शिंदे गट) माजी उपजिल्हाप्रमुख राहिलेल्या महिला पदाधिकाऱ्यास तेलंगणा पोलिसांनी नाशिकच्या पंचवटी परिसरातून अटक केली आहे. नाशिक पोलिसांच्या मदतीने तेलंगणा पोलिसांनी बुधवारी ही कारवाई केली. या कारवाईमुळे नाशिकमध्ये खळबळ उडाली आहे.
लक्ष्मी ताठे असे या माजी महिला पदाधिकाऱ्याचे नाव आहे. तेलंगणाच्या दामेरा पोलीस ठाण्याच्या हद्दीत पोलिसांनी गेल्या महिन्यात ०८ जूनला १९० किलो गांजा पकडला होता, याप्रकरणी ही कारवाई करण्यात आल्याची माहिती समोर आली आहे. या प्रकरणातच बीड आणि अहमदनगरच्या दोघा तस्करांना अटक करण्यात आली होती.
दरम्यान जून २०२३ मध्ये शिंदे गटाच्या महिला आघाडीतील पदाधिकाऱ्यांमध्ये वाद झाले होते. पक्षातील काही पदांवरील नियुक्तीवरून लक्ष्मी ताठे आणि शोभा मगर यांच्याशी शाब्दिक चकमक झाली होती. हे प्रकरण मुंबई नाका पोलीस ठाण्यात गेले. पोलीस ठाण्यात पुन्हा राडा झाला होता. या घटनेनंतर मगर आणि ताठे या दोघींचीही पक्षातून हकालपट्टी करण्यात आली. या प्रकरणात लक्ष्मी ताठे हिने कारवाईची मागणी करत मुंबई नाका पोलीस ठाण्यासमोर आत्मदहनाचा इशारा दिला होता.
तेलंगणा अमली पदार्थ विरोधी पथकाने केलेल्या कारवाईत तपासा दरम्यान लक्ष्मी ताठे यांचे नाव समोर आल्याने तेलंगणा पोलीस ताठे हिला अटक करण्यासाठी नाशिकमध्ये आले होते. ताठे हिच्यावर कारवाईसाठी नाशिक पोलिसांची मदत घेण्यात आली. महिनाभरानंतर पोलिसांनी त्यांच्यावर अटकेची कारवाई केली आहे. ताठे यांना यापूर्वी सुद्धा ओरिसातील गांजा प्रकरणात मध्यप्रदेशमधून अटक करण्यात आली होती. त्यावेळी त्या महिनाभर फरार होत्या.
