गुरुवार ११ जुलै
पश्चिमी नद्यांचे समुद्राला वाहून जाणारे पाणी पूर्वेकडे नगर जिल्ह्यात वळवून या माध्यमातून जिरायती भागातील पाण्याची गरज भागवली जाऊ शकते. प्रवरा खोऱ्यात आणखी साडेनऊ टीएमसी पाणी उपलब्ध होऊ शकते, यासाठी शिर्डी लोकसभेचे शिवसेनेचे (उद्धव बाळासाहेब ठाकरे) खासदार भाऊसाहेब वाकचौरे यांनी नाशिक जलसंपदा विभागाचे मुख्य अभियंता प्रकाश मिसाळ यांची भेट घेतली हा प्रश्न त्यांच्या समोर मांडला.
बुधवारी वाकचौरे यांनी मिसाळ यांची भेट घेत या संदर्भात त्यांच्याशी चर्चा करत अधिक माहिती घेतली. यावेळी रोहित वाकचौरे उपस्थित होते. पश्चिम भागाकडे जाणारे पाणी पूर्व भागात आणल्यास पिण्याचे पाणी, सिंचन व उद्योगाचे विषय मार्गी लागणार आहेत. यावेळी त्यांनी नद्यांचे रेखांकन, धरणातील गाळ, सिंचन व टंचाईसह विविध विषयांवर चर्चा केली.
चर्चा अंतर्गत मिसाळ यांनी वाकचौरे यांना सध्या ११ प्रकल्प कार्यरत असून, १४ प्रकल्प प्रगतिपथावर असल्याची माहिती दिली. यावेळी सर्व प्रकल्पांच्या अहवालावर सविस्तर चर्चा झाली. हा विषय लवकरच मार्गी लावण्यासाठी सहकार्य केले जाईल अशा आश्वासन देखील मिसाळ यांनी या बैठकीत खासदारांना दिले.
त्यामुळे त्याच्या काही दिवसात अनेक वर्षांपासून प्रलंबित असलेला हक्काचे घाट माथ्याचे पाणी पूर्वेकडे वळविण्याच्या प्रश्नाला चालना मिळण्याची शक्यता निर्माण झाली आहे. यासाठी येत्या पाच वर्षाच्या कार्यकाळात आपण प्रयत्न करणार असल्याचे खासदार भाऊसाहेब वाकचौरे यांनी म्हटले आहे.
