शुक्रवार १२ जुलै
सुसंस्कृत संगमनेरला अवैध धंद्यांचा लागलेला कलंक पुसण्यात स्थानिक पोलिसांपासून जिल्हा पोलीस दलापर्यंतची पोलीस यंत्रणा अयशस्वी ठरली आहे. शहरातील शांततामय वातावरणाला गालबोट लागू शकेल अशी गंभीर घटना घडण्याची पोलीस वाट बघत आहे की त्यांना अवैध धंदे सुरू असलेल्या शक्तिमान टॉवरचा पत्ता सापडत नाही, असा संशय निर्माण झाला आहे.
चार दिवसांपूर्वी ‘महाराष्ट्र संवाद न्यूज’ने संगमनेर शहराच्या मध्यवस्तीतील महापुरुषांच्या स्मारकाजवळ सुरू असलेल्या अवैध धंद्यांवर प्रकाश टाकत हॉटस्पॉट बनलेल्या या ठिकाणी गंभीर घटना घडण्याची चिन्हे असल्याचा संशय वर्तविला होता. त्यानंतर पोलिसांकडून या अवैध व्यवसायांवर कारवाई होईल, अशी अपेक्षा फोल ठरल्याने पोलिस आणि अवैध व्यावसायिकांमधील मधुर अर्थपूर्ण संबंधांच्या चर्चांना अप्रत्यक्षरीत्या दुजोरा मिळू लागला आहे.
तत्कालीन उपमुख्यमंत्री आर. आर. पाटील यांच्या कार्यकाळातील अपवाद वगळता येथील अवैध धंदे कधीही बंद झाल्याचे दिसत नाही. पोलिसांचे या धंद्यांवरील छापासत्र नेहमीच चर्चेचा विषय ठरले आहे. विशेष म्हणजे स्थानिक पोलीसच नव्हे तर पोलीस उपअधीक्षकांचे पथक, अप्पर पोलीस अधीक्षकांचे पथक, जिल्हा पोलीस अधीक्षकांचे पथक आणि नेहमीच वादाच्या भोवऱ्यात असलेले आर्थिक गुन्हे शाखेचे पथक या अवैध व्यवसायांवर कारवाया करताना दिसतात. माध्यमातून या कारवायांच्या बातम्या होत असल्या तरी पुढे काय होते हे मात्र समजत नाही.
अवैध धंद्यांचा हॉटस्पॉट ठरलेल्या शक्तिमान टॉवर्समध्ये बिंगो गेम, लोटो गेम, ऑनलाइन लॉटरी, गांजा सिगारेट, गुटखा, जुगार याबरोबरच अन्य गोष्टी देखील सर्रासपणे सुरू असतात. हे जवळच असलेल्या पोलीस यंत्रणेला माहिती नाही, यावर कोणी विश्वास ठेवणार नाही. विशेष म्हणजे या परिसरालगत असलेल्या एका रुग्णालयात दुचाकी आणि पायी जाण्या येण्यासाठी या टॉवर्स मध्ये असलेल्या रस्त्याचा सर्रासपणे वापर केला जातो. रुग्णालयात जाण्या येण्यासाठी या रस्त्याने महिलांचा देखील वावर असल्याने या व्यवसायाच्या कोंडीतून त्यांना देखील जावे लागते. त्यामुळेच येथे एखादी गंभीर घटना घडण्याची शक्यता वर्तवली जाते. महिलांना येथून येणे-जाणे करणे जिकरीचे बनले आहे. मात्र याचे कोणतेही गांभीर्य अवैध धंदे चालकांना अथवा संबंधितांवर कारवाई करणाऱ्या यंत्रणांना असल्याचे दिसत नाही.
अशी आहे स्थिती…
प्रशासकीय इमारतीत असलेले पोलीस उपअधीक्षक यांचे कार्यालय, प्रांताधिकार्यांच्या कार्यालयामागे असलेले डॉ. अमोल कर्पे यांचे रुग्णालय, समोरच नासिक पुणे महामार्ग लगत एका बाजूने अवैध धंदे तर दुसऱ्या बाजूने महापुरुष छत्रपती शिवाजी महाराज, डॉ. बाबासाहेब आंबेडकर यांचे पुतळे, मारुती मंदिर, समोरच राज्य उत्पादन शुल्क विभागाचे (दारूबंदी) भव्य कार्यालय, अवैध धंद्याच्या ठिकाणालगतच मुस्लिम धर्मियांचे प्रार्थना स्थळ असून ज्या यंत्रणांनी कारवाई करायची त्या सर्व यंत्रणांची कार्यालय अवघ्या शंभर ते दोनशे मीटर अंतरात आहेत. तरी देखील संबंधितांना या अड्ड्यांचा पत्ता मिळत नसल्याने कारवाई करणाऱ्या यंत्रणेवर संशय निर्माण झाला आहे.
