रविवार २१ जुलै
संगमनेर तालुक्यातील साकुर पठार भाग नेहमीच अवैध सावकारकीच्या घटनांनी नेहमीच चर्चेत राहिला आहे. बिरेवाडीतील एका सावकार पिडीत व्यक्तीची आर्थिक पिळवणूक झाली, जमीन लाटण्याचा प्रकार केला, मानसिक त्रास देत पैशाचा तगादा लावत शिवीगाळ, मारहाण करण्याचे प्रमाण वाढल्याने या त्रासाला कंटाळून सबंधित व्यक्तीने संगमनेरच्या उपनिबंधकांकडे तक्रार केली. या रागातून तक्रारदाराबाबत नियोजित कट आखून भ्याड हल्ला करत संपूर्ण कुटुंब संपवायची धमकी दिल्याची घटना गुरूवारी (१८ जुलै) सकाळी बिरेवाडी परिसरात घडली.
साकुरजवळील बिरेवाडी गावातील तरुण शेतकरी मुक्ताराम काशिनाथ सागर हे कुटुंबासोबत राहत आहे. याच गावातील सावकार लालू नारायण ढेंबरे व त्यांचा मुलगा योगेश लालू ढेंबरे हे अवैध सावकारकीचा व्यवसाय करत असून त्यांचेकडून काही दिवसापूर्वी सागर यांनी एक लाख रुपये रक्कम व्याजाने घेतले होते.
या रक्कमेचा आजतागायत बारा लाख रुपये परतावा केला आहे. त्याबाबत पुरावे देखील आहेत. त्यावेळी २० गुंठे जमीन गहाणखत करण्याचे नावाखाली फसवून खरेदी खत करून घेतले असून अजूनही काही वाढीव रक्कमेसाठी शिवीगाळ, मारहाण करत पैशाचा तगादा लावल्याने सागर यांनी उपनिबंधक यांचेकडे तक्रार केली होती. हे प्रकरण उपनिबंधक कार्यालयाकडे न्यायप्रविष्ठ आहे. तक्रार केल्याचा राग मनात ठेवून हल्ला झाल्याचे फिर्यादी सागर यांनी म्हटले आहे.
गुरूवारी सकाळी बिरेवाडी गावातील सोसायटीसमोर तक्रारदार मुक्ताराम सागर व सावकाराचे चुलत भाऊ पंढरीनाथ पांडुरंग ढेंबरे यांचेत याच कारणावरून किरकोळ बाचाबाची झाली. यावेळी तेथे उपस्थित नागरिकांनी सदर भांडण मिटवले. यानंतर सागर हे आपल्या मोटरसायकलवरून जात असताना पाठीमागून मोटरसायकलवर पंढरीनाथ ढेंबरे त्यांचा पाठलाग करत आले. सागर यांचे मोटरसायकलला गाडी आडवी लावून उभी करतं म्हणाले की, माझा चुलत भाऊ लालू ढेंबरे व त्यांचा मुलगा योगेश ढेंबरे यांचे विरोधात उपनिबंधक कार्यालयाकडे तक्रार अर्ज का दिला. तक्रार अर्ज दिल्याचा राग मनात धरून त्यांनी शिवीगाळ करत लाथा बुक्क्यांनी मारहाण केली. तर जमिनिवर खाली पाडून मारहाण करत त्याचे हातातील चावीचे कीचनला असलेला चाकू सागर यांचे उजव्या डोळ्याच्या वरच्या बाजूला मारून दुखापत करून जखमी केले. तसेच तक्रार मागे घे. नाहीतर तुला व तुझ्या कुटुंबाला ठार मारून टाकील अशी धमकी दिली.
याप्रकरणी मुक्ताराम काशिनाथ सागर यांचे फिर्यादीनुसार घारगाव पोलिस स्टेशनला विविध कलमान्वये गुन्हा दाखल करण्यात आला आहे. तपास पोलिस हेड कॉन्स्टेबल आदिनाथ गांधले करत आहेत.
पोलीस डोंगरे यांना अटक कधी करणार…
साकूर परिसरात अवैध सावकारकी फोफावली आहे. याआधी वाकचौरे कुटुंबाला बेघर करणाऱ्या डोंगरे सावकारांवर गुन्हा दाखल आहेत. पण अद्याप या डोंगरे बंधूना अटक करण्यात आली नाही. परंतु नुकताच जिल्हा सत्र न्यायालयाने डोंगरे सावकारांचा जामीन अर्ज फेटाळला आहे. तेव्हा आता पोलीस डोंगरे यांना अटक करणार का असा प्रश्न उपस्थित होत आहे.
