सोमवार, २२ जुलै | अहमदनगर
मुख्यमंत्री उपमुख्यमंत्र्यांसह पोलीस प्रशासनातील वरिष्ठ अधिकाऱ्यांना दिलेल्या एका पत्राच्या माध्यमातून एलसीबीसह पोलीस दलातील भ्रष्टाचार समोर आणत कारवाईची मागणी केल्यानंतरदेखील कोणतीही कारवाई न झाल्याने अखेरीस अहमदनगरचे खासदार निलेश लंके यांनी पोलीस अधीक्षकांच्या कार्यालयासमोर उपोषण सुरू केले आहे. पोलीस दलातील भ्रष्टाचाराने बरबटलेल्या व्यवस्थेविरोधात थेट खासदारच उपोषणाला बसल्याने राजकीय पदाधिकाऱ्यांसह नागरिकांनी देखील उपोषणात सहभाग घेतला आहे.
सोमवारी, २२ जुलैला लंके यांनी उपोषण सुरू केले आहे. तत्पूर्वी भ्रष्टाचाराची मडकी घेऊन उपोषणकर्ते मोर्चा आणि पोलीस अधीक्षक कार्यालयात आले. लंके यांच्यासोबत महाविकास आघाडीतील राजकीय पदाधिकारी कार्यकर्ते आणि पोलिसांकडून त्रस्त असलेले नागरिकदेखील सहभागी झाले आहे.
लंके यांनी गेल्या आठवड्यात नगर जिल्ह्यातील पोलीस प्रशासनाच्या विशेषत: एलसीबीच्या हप्तेखोरीची अधिकारी कर्मचाऱ्यांच्या नावानिशी तक्रार मुख्यमंत्री एकनाथ शिंदे उपमुख्यमंत्री तथागृहमंत्री देवेंद्र फडणवीस उपमुख्यमंत्री अजित पवार नाशिकचे विशेष पोलीस महानिरीक्षक व पोलीस महासंचालक यांच्याकडे एका पत्राद्वारे केली होती.
सात दिवसात विशेष दर्जाचा अधिकारी नेमून संबंधितांची चौकशी करून कारवाई करण्याची मागणी या पत्राद्वारे त्यांनी केली. मात्र या पत्राची दखल घेतली न गेल्याने लंके यांनी सोमवारपासून अहमदनगरचे पोलीस अधीक्षक राकेश ओला यांच्या कार्यालयासमोर उपोषण सुरू केले आहे.
आम्ही आज भ्रष्टाचाराचे प्रतिनिधिक मडके फोडतोय भ्रष्टाचाराचा पापाच मडकं भरलं असून आजपासून ते फोडायला आम्ही सुरुवात करत आहोत पोलीस दलातील हप्त्यांचा त्रास सर्वसामान्य जनतेला सोसावा लागत आहे कोणतेही काम पैशाशिवाय होत नाही याला वाचा फोडल्याशिवाय आम्ही शांत बसणार नाही – खासदार निलेश लंके
