धांदरफळ खुर्द सबस्टेशनवर शेतकऱ्यांचा धडक आक्रोश मोर्चा; अनियमित वीजपुरवठ्यामुळे महावितरणविरोधात संताप, ८ दिवसांत प्रश्न न सुटल्यास तीव्र आंदोलनाचा इशारा

Annant Ppangarkar

महाराष्ट्र संवाद न्यूज ऑनलाईन –

तालुक्यातील धांदरफळ पंचक्रोशीसह परिसरात मागील अनेक दिवसांपासून सुरू असलेल्या अपुऱ्या आणि खंडित वीजपुरवठ्यामुळे शेतकरी कमालीचे त्रस्त झाले आहेत. सातत्याने निवेदने देऊनही महावितरणकडून कोणतीही ठोस कारवाई होत नसल्याने संतप्त झालेल्या शेतकऱ्यांनी आज धांदरफळ खुर्द येथील सबस्टेशनवर धडक देत जोरदार आक्रोश मोर्चा काढला. महावितरणच्या चुकीच्या नियोजनामुळे शेती पिकांचे नुकसान होत असून शेतकऱ्यांना रात्रीच्या वेळी जीव मुठीत धरून शेताला पाणी द्यावे लागत असल्याने आंदोलकांनी अधिकाऱ्यांना धारेवर धरले.

सबस्टेशनवर जमलेल्या शेतकरी आणि युवकांच्या शिष्टमंडळाने वीज विभागाच्या अधिकाऱ्यांना आपल्या विविध समस्यांचा पाढा वाचून दाखवला व थेट निवेदन सुपूर्द केले. या प्रसंगी उपकार्यकारी अभियंता रमेश घुगे, ज्युनिअर इंजिनिअर पवार तसेच अधिकारी सातभाई साहेब यांच्यासमोर शेतकऱ्यांनी आपल्या तीव्र भावना व्यक्त केल्या.

सध्या शेतीसाठी मिळणारी थ्री-फेज वीज ही रात्री ९:४५ ते पहाटे ५:४५ या वेळेत दिली जात आहे. ग्रामीण भागात वन्य प्राण्यांचा मोठा वावर असताना भरअंधारात शेताला पाणी देणे शेतकऱ्यांच्या जिवावर बेतणारे ठरत आहे. त्यातच दररोज सायंकाळी ६ ते ९ या वेळेत केवळ ग्रामीण भागातच लोडशेडिंग केले जात असल्यामुळे सर्वसामान्यांचे जनजीवन विस्कळीत झाले आहे.

या आक्रोश मोर्चामध्ये धांदरफळ खुर्द, धांदरफळ बुद्रुक, निमगाव, निमगाव बुद्रुक, पेमगिरी, नांदुरी, सांगवी, कवठे आणि निमज या गावांतील शेतकरी व तरुण मोठ्या संख्येने सहभागी झाले होते. महावितरणने येत्या आठ दिवसांत वीजपुरवठा सुरळीत न केल्यास आणि लोडशेडिंगच्या वेळेत बदल न केल्यास तीव्र स्वरूपाचे आंदोलन छेडण्याचा इशारा निवेदनाद्वारे देण्यात आला. शेतकऱ्यांचा हा रोष पाहून उपकार्यकारी अभियंता रमेश घुगे यांनी पुढील आठ दिवसांच्या आत वीजपुरवठ्याशी संबंधित सर्व समस्या सोडवण्याचे ठोस आश्वासन उपस्थितांना दिले.

लोडशेडिंग बंद करण्यासाठी काँग्रेसचा सातत्याने पाठपुरावा- तालुक्यात दररोज सायंकाळी सहा ते नऊ या वेळेत होणाऱ्या लोडशेडिंगमुळे विद्यार्थ्यांचा अभ्यास, शेतकऱ्यांची कामे आणि पशुपालकांची गोठ्यातील कामे पूर्णपणे खोळंबत आहेत. ही गैरसोय थांबवून लोडशेडिंग रद्द करावे यासाठी डॉ. जयश्रीताई थोरात यांच्या नेतृत्वात काँग्रेसकडून सातत्याने आंदोलने करून पाठपुरावा केला जात आहे. शेतकऱ्यांना पूर्ण दाबाने व सुरळीत वीजपुरवठा मिळावा ही मागणी सातत्याने लावून धरली जात आहे.