बुधवार, २४ जुलै
डाक चौपाल हा टपाल विभागाचा अभिनव उपक्रमा असून संगमनेर नगरपरिषद पोस्ट विभागाच्या जनकल्याणकारी योजना शहरातील नागरिकांपर्यंत पोहोचविण्यास मदत करेल. डाक विभागाची नाळ सामान्य माणसांपर्यंत जोडलेली असल्याने पोस्टाच्या फायदेशीर योजनांचा सर्वांनी लाभ घ्यायला हवा, असे आवाहन संगमनेर नगर परिषदेचे मुख्याधिकारी राहुल वाघ यांनी केले.
संगमनेर मुख्य डाकघर आणि संगमनेर नगरपालिका यांच्या विद्यमाने संगमनेरमध्ये प्रथमच डाक चौपाल या अभिनव उपक्रमाचे आयोजन करण्यात आले होते. नगरपालिकेच्या रामकृष्ण सभागृहात या डाक चौपाल या उपक्रमाचा मान्यवरांच्या उपस्थितीत शुभारंभ करण्यात आला.
यावेळी पालिकेचे मुख्याधिकारी राहुल वाघ, उपमुख्याधिकारी संजय पेखळे, कार्यालयीन निरीक्षक राजेश गुंजाळ, श्रीरामपूर डाक विभागाचे अधीक्षक हेमंत खडकीकर, सहायक अधीक्षक मुख्यालय संतोष जोशी, संगमनेरचे सहाय्यक अधीक्षक रविकुमार झावरे, उपडाकपाल महेश कोबरणे, विपणन अधिकारी अमित देशपांडे, रोखपाल अमोल गवांदे आदी मान्यवर उपस्थित होते.
यामध्ये मुख्यमंत्री लाडकी बहिण योजना बँक खाते, बाल आधार, आधार-मोबाईल लिंकिंग, अपघाती विमा, महिला सन्मान बचत पत्र, सुकन्या समृद्धी योजना, ज्येष्ठ नागरिक योजना, टपाल जीवन विमा आदी सेवा पुरवण्यात आल्या.
रविकुमार झावरे म्हणाले, भारतीय डाक विभागाच्या योजना, नागरीक केंद्रित सुविधा जनसामान्यांपर्यंत पोहोचवण्यासाठी संपूर्ण देशात डाक चौपाल कार्यक्रमाचे आयोजन करण्यात येत आहे.
हेमंत खडकीकर म्हणाले, पोस्टाच्या योजना व नागरिक केंद्रित सेवा यांची यशस्वीपणे अंमलबजावणी करण्यासाठी डाक विभाग सर्वतोपरी सज्ज आहे.
यावेळी प्रतिनिधिक स्वरूपात पोस्टाच्या विविध योजनांचा लाभ घेणाऱ्या लाभधारक राम पराई, श्रीराम झंवर, ऋचा ब्राह्मणकर, प्रशांत पवार, मांगी देवानी आदींसह विविध खातेदारांचा योजनांची पुस्तके आणि गुलाब पुष्प देऊन स्वागत अन सत्कार करण्यात आला. वैशाली कुलकर्णी यांनीही आपले मनोगत व्यक्त केले.
याप्रसंगी पोस्टाचे, नगरपालिकेचे अधिकारी, कर्मचारी उपस्थित होते. कार्यक्रम यशस्वीतेसाठी गौरव मंत्री, उमेश ढोले, कल्पेश वाघ, प्रशांत पवार, संजय आंबरे, विजय पथवे यांनी प्रयत्न केले.
