हप्तेखोर एलसीबी दरमहा करतेय २७ कोटी ६० लाखाची हप्ते वसुली!
दोन टक्के हप्तेखोरांमुळे जिल्हा पोलीस दलाची नाचक्की, जिल्हा पोलीस प्रमुख गप्प का?
गुरुवार, २५ जुलै
जिल्हा पोलीस प्रशासनाविरोधात विशेषत: अहमदनगर एलसीबीच्या हप्तेखोरी विरोधात उपोषणास बसलेल्या खासदार निलेश लंके यांनी बुधवारी एका पत्रकार परिषदेच्या माध्यमातून नगरचे पोलीस वसूल करत असलेल्या हप्त्याचे रेटकार्डच जाहीर केले. नगर एलसीबीकडून तब्बल २७ कोटी ६० लाख रुपयांचे हप्ते दरमहा गोळा केले जात असल्याची धक्कादायक माहिती खासदार लंके यांनी दिली.
खासदार लंके यांनी दिलेली माहिती कोणत्याही सामान्य नागरिकाचे डोळे पांढरे होतील अशी धक्कादायक आहे. कोणत्या व्यवसायातून किती रुपयांच्या हप्ते नगरच्या वादग्रस्त एलसीबीकडून गोळा केले जातात याची सविस्तर यादीच लंके यांनी जाहीर केली.
पत्रकार परिषदेत बोलताना खासदार लंके म्हणाले, जिल्हा पोलीस दलातील दोन टक्के अधिकारी व कर्मचाऱ्यांमुळे संपूर्ण पोलीस दल बदनाम होत आहे. या शाखेच्या कृत्यांमुळे समाज भयभीत झाला आहे. अवैध धंद्यांना कोण पाठीशी घालते? जिल्ह्यात झालेल्या खुनांचा तपास का लागत नाही? स्थानिक गुन्हे शाखेचे पोलीस निरीक्षक दिनेश आहेर हे चुकीच्या कर्मचाऱ्यांची ऑर्डर आपल्या विभागात करून घेतात? सायबर विभागात बदली असलेले कर्मचारी स्थानिक गुन्हे शाखेत काम करतात. याच विभागाची प्रोत्साहनपर बक्षिसे घेतात. आजच याच विभागाच्या चव्हाण नावाच्या कर्मचाऱ्याविरोधात लाचलुचपत विभागामार्फत गुन्हा दाखल करण्यात आला. तरीही पोलीस प्रशासनास पुरावे हवेत का, असा सवाल लंके यांनी यावेळी केला.
तीन दिवस झाले तरी पोलीस अधीक्षक भेटीसाठी का येत नाहीत?
खासदार निलेश लंके यांच्या उपोषणास तीन दिवस झाले आहे तरी पोलीस अधीक्षक त्यांच्या भेटीसाठी का येत नाहीत? भ्रष्टाचाराला पाठीशी घालण्याचे काम वरिष्ठ अधिकारी करत आहेत का? सकारात्मक चर्चा होत असताना वरिष्ठ अधिकारी मात्र वेगळाच प्रस्ताव देतात, याचा अर्थ या भ्रष्टाचारास राज्याच्या गृह खात्याचे पाठबळ आहे असा संदेश राज्यात जाईल. या आंदोलनाकडे दुर्लक्ष झाल्यास राज्य पातळीवर हे आंदोलन नेले जाईल. आता जिल्हा पोलीस अधीक्षकांशी आम्ही चर्चा करणार नाही, आयुक्त दर्जाच्या अधिकाऱ्याशी चर्चा करू. – राजेंद्र फाळके, जिल्हाध्यक्ष राष्ट्रवादी काँग्रेस.
वरिष्ठ पातळीवरून पाठबळ...
काही अधिकारी व कर्मचाऱ्यांनी पोलीस दलाला कलंक लावला आहे. त्यांना वरिष्ठ पातळीवरून अधिकारी पाठीशी घालतात हे दुर्दैव आहे. प्राजक्त तनपुरे, आमदार तथा माजी मंत्री.
असे आहे खासदार लंके यांनी जाहीर केलेले पोलिसांचे रेट कार्ड…
चंंदन तस्करी, रेशनींग ४० लाख
हिरा गुटखा ६८ लाख
विमल गुटखा ६० लाख
आरएमडी गुटखा २५ लाख
नगर शहर कॅफे ५० लाख
वाळू ट्रॅक्टर २ कोटी ५० लाख
वाळू गाडी ४ कोटी ८० लाख
जेसीबी १ कोटी ४० लाख
पोकलेन ५० लाख
आयपीएल सट्टा ५० लाख
वेश्या व्यवसाय हॉटेल ३० लाख
इतर अवैध व्यवसाय ५५ लाख
मटका ०७ कोटी ५५ लाख
बिंगो ०१ कोटी ४० लाख
मावा ०१ कोटी ३० लाख
दारू हॉटेल ७५ लाख
डिझेल, पेट्रोल तस्करी १२ लाख ५० हजार
ट्रक रिक्षा १० लाख
जुगार ७५ लाख
