शुक्रवार, २६ जुलै
तीन अंगणवाड्यांच्या बांधकामाचे पैसे ठेकेदाराला काढून देण्यासाठी तक्रारदाराकडून २६ हजार रुपयांची लाच घेताना नंदुरबारच्या अक्कलकुवा पंचायत समितीचे गटविकास अधिकारी विजय लोंढे व सहाय्यक लेखा अधिकारी रवींद्र लाडे लाच लुचपत प्रतिबंधक विभागाच्या सापळ्यात अडकले असून या दोघा लाचखोराविरुद्ध पोलीस ठाण्यात गुन्हा दाखल करण्यात आला आहे.
लाच लुचपत प्रतिबंधक विभागाच्यावतीने या संदर्भात देण्यात आलेल्या माहितीत म्हटले आहे की, तक्रारदार यांनी पंचायत समिती अक्कलकुवा व ग्रामपंचायत डाब अंतर्गत एकूण तीन अंगणवाड्यांचे बांधकाम पूर्ण केले आहे. तिन्ही कामांच्या बिलाची रक्कम ग्रामपंचायतीच्या खात्यावर वर्ग करण्यासाठी तक्रारदार यांनी सहाय्यक लेखाधिकारी रविंद्र लाडे यांच्याकडे वेळोवेळी पाठपुरावा केला. परंतु तक्रारदार यांची बिलाची रक्कम त्यांनी ग्रामपंचायतीच्या खात्यावर वर्ग केली नाही.
यानंतरही तक्रारदार यांनी वेळोवेळी पाठपुरावा केला असता, सहाय्यक लेखाधिकारी यांनी तक्रारदार यांच्या एका कामाचे बिल २,४६,८५०/- रुपये ग्रामपंचायतीच्या खात्यावर वर्ग केले जे तक्रारदार यांना त्यांच्या बँक खात्यात मिळाले. परंतु सहाय्यक लेखाधिकारी यांनी तक्रारदार यांचे एक बिल काढून दिल्याचा मोबदला व उर्वरित दोन बिलांची रक्कम काढण्यासाठी अशा एकूण तिन्ही बिलांच्या रकमेबाबत तक्रारदार यांच्याकडून स्वतःसाठी ८,०००/- व गटविकास अधिकारी यांच्यासाठी १८,०००/- रुपयांची अशी एकूण २६,०००/- रुपये लाचेची मागणी केली.
गुरुवारी लाच लुचपत विभागाच्या अधिकाऱ्यांनी पंचांसमक्ष केलेल्या सापळा कारवाई दरम्यान सहाय्यक लेखाधिकारी रवींद्र लाडे याने आठ हजार रुपये लाचेची रक्कम तक्रारदार यांच्याकडून स्वीकारली. तसेच गटविकास अधिकारी यांनी तक्रारदार यांच्याकडून अठरा हजार रुपये लाचेची रक्कम स्वतः स्वीकारून सहाय्यक लेखाधिकारी यांना तक्रारदाराकडून यांच्याकडून लाच मागण्याच्या व लाच स्वीकारण्याच्या कृतीस प्रोत्साहन दिले म्हणून गुन्हा दाखल करण्यात आला आहे.
लाच लुचपतच्या नंदुरबार युनिटचे पोलीस उपअधीक्षक राकेश चौधरी, पोलीस हवालदार विलास पाटील, पोलीस हवालदार विजय ठाकरे, पोलीस नाईक देवराम गावित, पोलीस नाईक हेमंतकुमार महाले, पोलीस नाईक सुभाष पावरा, पोलीस नाईक नरेंद्र पाटील व पोलीस नाईक जितेंद्र महाले यांच्या पथकाने ही कारवाई केली.
