सोमवार, २९ जुलै
शेतामध्ये गवत कापत असताना दबा धरून बसलेल्या बिबट्याने वयोवृद्ध महिलेवर हल्ला करत तिला शेतात ओढून नेत असताना नातवाच्या हा प्रकार लक्षात आल्याने बिबट्याच्या मागे धाव घेत बिबट्याच्या तावडीतून त्याने आजीचा जीव वाचविण्याची घटना समोर आली. दरम्यान बिबट्याच्या हल्ल्यात गंभीर जखमी महिलेवर संगमनेरमधील खासगी रुग्णालयात उपचार सुरू आहेत.
संगमनेर तालुक्यातील देवगाव गावामध्ये ही घटना रविवारी सकाळी दहा वाजण्याच्या सुमारास घडली. भिमाबाई लक्ष्मण लामखडे (वय ७५, रा. देवगाव, संगमनेर) असे बिबट्याच्या हल्ल्यात जखमी झालेल्या वयोवृद्ध महिलेचे नाव आहे.
सकाळी दहा वाजण्याच्या सुमारास भीमाबाई लामखडे आपल्या शेतामध्ये गवताची कापणी करत होत्या. यावेळी जवळच बिबट्या दबा धरून बसला होता. जवळ असलेला बिबट्या त्यांच्या निदर्शनास आला नाही. संधी साधा बिबट्याने गवत कापणाऱ्या लामखडे यांच्यावर झेप घेत त्यांना शेतात ओढून नेले.
भिमाबाई यांचा ओरडण्याचा आवाज ऐकल्याने त्यांचा नातू प्रसाद माधव लामखडे याने आवाजाच्या दिशेने धाव घेतली असता बिबट्या आजीला ओढत नेत असल्याचे समोरचे दृश्य बघून त्याने देखील आरडाओरडा करण्यास सुरुवात केली. तसेच त्याने बिबट्याच्या मागे धाव घेतली. भिमाबाई आणि प्रसाद यांच्या ओरडण्याचा आवाज ऐकून लामखडे कुटुंबातील लोक आवाजाच्या दिशेने पळाले. त्यामुळे बिबट्याने आजीला सोडून धूम ठोकली.
आजीच्या आवाजामुळे सतर्क झालेल्या प्रसादने देखील आरडा ओरडा केल्याने बिबट्याच्या तावडीतून आजीला वाचविण्यात तो यशस्वी झाला. दरम्यान बिबट्याच्या हल्ल्यात गंभीर जखमी झाल्या. भिमाबाई यांच्या गळा, नाक, तोंड, कानाला गंभीर स्वरूपाच्या जखमा झाल्या असून शहरातील खाजगी रुग्णालयात त्यांच्यावर उपचार सुरू आहे.
