मंगळवार, ०६ ऑगस्ट
राहाता – सलग दुसर्‍या हंगामासाठी जिल्हा सहकारी बँकेने राजकिय दबावापोटी श्रीगणेश सहकारी साखर कारखान्याचे कर्ज नाकारले, याचा निषेध व्यक्त करण्यासाठी सभासद व शेतकर्‍यांच्यावतीने जिल्हा बँकेच्या राहाता शाखेवर येत्या सोमवारी (१२ ऑगस्ट) सकाळी १० वाजता भव्य निषेध मोर्चाचे आयोजन करण्यात आले आहे, अशी माहिती कारखान्याचे माजी अध्यक्ष तथा जेष्ठ संचालक अ‍ॅड. नारायणराव कार्ले पाटील यांनी दिली.
या आंदोलना बाबतचे निवेदन सर्व संबंधितांना पाठविल्याचे सांगत अ‍ॅड. कार्ले म्हणाले, श्रीगणेश सहकारी साखर कारखान्याला मागील हंगामात जिल्हा सहकारी बँकेने ४० कोटी रुपये कर्ज मंजुर केले होते. तसे पत्रही जिल्हा बँकेने कारखान्याला दिले होते. परंतु मंजुर केलेले कर्ज राजकिय सुडबुध्दीने बँकेने नाकारले.
याचा परिणाम म्हणुन त्या काळात ऊसतोड कामगार भरतीसह अनुषंगिक खर्च करता आले नाही. त्यामुळे कारखान्याचे मोठे अर्थिक नुकसान झाले. सन २०२४-२०२५ च्या हंगामासाठी गणेश कारखान्याने जिल्हा बँकेकडे ३० कोटी रुपयांचे कर्ज मागणी प्रस्ताव पाठविला. हे कर्ज मिळावे म्हणुन संचालक मंडळ, परिवर्तन मंडळाच्या नेत्यांनी अनेक वेळा बँकेशी संपर्क करुन व प्रत्यक्ष भेटून सदर कर्ज प्रस्ताव मंजुर करण्यासाठी विनंती केली. परंतु जिल्हा बँक सदर प्रस्तावाच्या मंजुरीसाठी चालढकल करत आहे.
सदर प्रस्ताव मंजुर करु नये म्हणुन काही बड्या राजकिय नेत्यांचा दबाव जिल्हा बँकेच्या व्यवस्थापनावर असल्याने व्यवस्थापन मंडळ निर्णय घेत नाही. व्यवस्थापन मंडळाच्या चुकीच्या धोरणामुळे कारखाना सभासद, कामगार व इतर घटकांचे मोठे अर्थिक नुकसान होणार आहे. जिल्हा बँकेने इतर कारखान्यांना कर्ज वितरण केले आहे. त्यास आक्षेप नाही. परंतु गणेशचे बॅलन्सशिट इतर कारखान्याच्या तुलनेत चांगले असताना केवळ गणेश बंद पडावा, या राजकिय हेतुने काही राजकिय मंडळी सभासद, कामगार, शेतकरी यांच्या अन्नामध्ये माती कालविण्याचा प्रयत्न करत आहे.
एकूणच संबधित राजकिय पुढार्‍यांनी व बँक व्यवस्थापनाने गणेश कारखान्याचा कर्ज प्रस्ताव प्रकरण मान्यतेस आजतागायत मंजुरी दिली नाही. त्याच्या निषेधार्थ येत्या सोमवारी (१२ ऑगस्ट) राहाता येथील विरभद्र मंदिरापासुन मोर्चाला सुरुवात करुन जिल्हा बँकेच्या राहाता येथील शाखेवर सदरचा मोर्चा नेण्यात येवून बँकेस कारखान्याच्या मागणीचे निवेदन देण्यात येणार असल्याचे अ‍ॅड. कार्ले पाटील यांनी सांगितले.
